Ilulissat: Qatserisartut eqqakkat akornanni ujaasillutik ulapputtut

Politiit pingasunngornermi ilisimatitsissutigaat, Ilulissat ikuallaaviata eqqaani misissuineq suli ingerlanneqartoq.

- Maannakkorpiaq nalilerneqarpoq, qatserisartut politiillu eqqakkat akornanni misissuinertik kingusinnerpaamik ataatsinngornermi 11. oktober 2021 naammassisimassagaat, politiit allapput.

Sulisut Danmarkimeersut misissuisunut ikiuiartorlutik pingasunngornermi Ilulissanut tikissapput. Toqusimasut timaannik misissuisartut teknikkikkullu misissuisartut misissugassanik arlalinnik tigusissapput, ilaatigut paasiniarlugu inuup timaata ilai nassaarineqartut qangarpiaq timimiit peerneqarsimanersut.

- Maannangaaq takusinnaalereerparput suliami annertungaatsiartumik suliaqartoqassasoq. Kalaallit Nunaanni Politiit taamaammat misissuisoqarnerani pitsaanerpaamik atugassaqartitsiniarlutik kiisalu illoqarfimmi innuttaasut toqqissisimatinniarlugillu isumannaatsuutinniarlugit sulisussanik Ilulissanut tikisitsisimapput, politimesteri Bjørn Tegner Bay tusagassiorfinnut nalunaaruteqarnermi oqarpoq.

Ineqartitsineq isornartorsiorneqareersoq qatserisartut qujaffigineqartut

Politimesterip qatserisartut suliami takussutissaasinnaasunik allanik nassaarniarlutik ikuallaavimmi eqqakkanik misissueqataanerannik qujassuteqarfigai:

- Qatserisartut ikuallaavimmi misissueqataanngitsuuppata suliami tamaanga killissimanavianngikkaluarpugut. Ikiuunnerat nallernissaqanngilaq aamma misissuinermut qularutissaanngitsumik aalajangeeqataasuupput, politimesteri oqarpoq.

Taassuma ilanngullugu oqaatigaa, qatserisartut allamiit tikisinneqartut inissikkallartariaqarnissaat pisariaqarsimasoq. Qatserisartunut inissiiffiusimasoq pillugu asseq pingasunngornermi ullaakkut Facebookikkut oqallisaangaatsiareersoq taamatut nalunaaruteqartoqarpoq.

Madrassit saattunnguit nungullarsimasullu

Madrassit saattunnguit sinngullu-puui pillugit assit Facebookikkut 400-ngajariarlugit takutinneqaqattaarsimapput. Qatserisartut Ilulissat ikuallaaviani inuup timaata sinneranik nalunaaquttap akunnerpassuini ujaasereersimallutik inigisaat pillugu asseq takuneqarsinnaasimavoq.

Facebookikkut takutitassiami ilaatigut allassimavoq, uffarfissaqaratillu igaffissaqanngitsut. Madrassit saattunnguit sinngullu-puui kisimik atugassianngortinneqarsimapput. Tassa qatserisartut Aasianneersuullutillu Sisimiuneersut uffarsinnaanatillu nerisassiorsinnaanngillat.

Avannaata Kommuniata Kalaallillu Nunaanni Politiit aallartisartoqarnerani unammilligassaqartoq eqqumaffigivaat, kommunillu pissutsit pitsaanerulersinniarai, tusagassiorfinnut nalunaaruteqarnermi oqaatigineqarpoq:

- Avannaata Kommunianit nunaarrutigilluinnarparput, politiit Ilulissat ikuallaaviani misissuinerannut ikiuussinnaagatta. Tassunga atatillugu qatserisartut Nunatsinnit tamaneersut misissuisoqarneranut ikiuussinnaammata qujaffigerusuppakka.

Kommunip pissutsit pitsaanerulersinniarai

-Qaterisartut maanakkut inissisimaffigigallagaanni atugassarititaasut pitsaanerulersinneqarnissaat kommunimiit anguniarparput. Qatserisartut toqqissisimanartumik atugaqarlutik qasuersaarfissaqarnissaat sulissutigaarput, Avannaata Kommuniani borgmesteri Palle Jerimiassen nalunaaruteqarnermi oqarpoq.

Arfininngornermi unnukkut qulingiluat-qeqqata missaanni inuup timaata ilaanik nassaartoqarmat Ilulissanilu politiit misissuillutik aallartimmata suliaq uissuumminartoq aallartinneqarpoq.

Qatserisartut politiit eqqakkat akornanni timip ilaanik allanik ujaasinerannut ikiuupput.