Ilulissat: - Angorusutarput anguarput
Politiit Ilulissani toqutsisoqarsimaneranik suliami inuit marluk tigummigallagassanngortinneqarnerat naammagisimaarpaat.
Politiit arfininngornermi unnuttoq ilisimatitsissutigaat, Ilulissat toqutsisoqarsimaneranut atatillugu angut novembarip tallimaata tungaanut arnarlu nalunaaquttap akunnerini 72-ini tigummigallagassanngortinneqarsimasut.
Vicepolitiinspektøri Jan Lambertsen sapaammi oqaluttuarpoq, tigummigallagassanngortitsinissamik politiit piumasaqarnerat eqqartuussivimmit malinneqarsimasoq:
- Angorusutarput anguarput. Arnap pineqartup nalunaaquttap akunnerini 72-ini tigummigallarneqarnissaanik piumasaqarnerput asuli pisimanngilaq, Jan Lambertsen oqarpoq.
Suliami arnap qanoq pisimanera erseqqinnerusumik oqaatigerusunngilaa, oqaatigaluguli taamatut pisoqarsimatillugu nalunaaquttap akunnerini 72-ini tigummigallagaqartarneq nalinginnaasuusoq:
- Piffissami sivikinnerusumi tigummigallagaqartoqarnissaanik piumasaqaraangatta, uppernarsaatitut takussutissat ajoqusersimasinnaanerinik naliliisarnerput pissutaasarpoq, aamma inunnut allanut sunniuteqarsinnaasumik pisoqarsinnaasarpoq imaluunniit pissutsit allat suliamut sunniuteqarsinnaaneri pissutigisarpavut, Jan Lambertsen oqarpoq.
Misissuinerit naammassineqassasut
Taassuma oqaluttuaraa, sumiiffimmi politiit pinerluttoqarsimaneranik ilimagisaani teknikkikkut misissuinerit kiisalu suliami uppernarsaatit inissinniarlugit suliat politiinit suliaralugit naammassineqassasut:
- Paasissutissat pissarsiarineqarsimasut ilumoortuunersut misissorneqassapput aamma pisimasut eqqartuussivimmi uppernarsaatitut atorneqartussat tunngavilersorneqassapput.
- Misissuinerput aqussinnaallugu nammineq isumaqarpugut. Angorusutarput anguarput. Toqutsisoqarsimanerani matumani inuit ilisimasaqartut pissarsiarisimallugit isumaqarpugut.
Toqutaasimasup kinaanera suli nalunaarutigineqassanngitsoq
Sermitsiaq.AG toqutaasimasup kinaanera paaserusullugu innutaasunit arlaleriarluni saaffigineqartarsimavoq. Jan Lambertseniil politiit toqutaasimasorisaat kinaanersoq suli oqaluttarerusunngilaa.
Jan Lambertsenip oqaatigaa, inuup timata sinneranit DNA-mik misissugassatut tiguneqarsimasut ataasinngornermi akissutissarsineqassasut naatsorsuutigineqartoq, tamatumalu kingornatigut toqutaasimasup kinaanera politiit tamanut saqqummiutissagaat naatsorsuutigineqartoq.