Ilulissat: Albatros Arctic Circle pisisoq
Ilulissani suliffeqarfik takornarialerinermik suliffeqarfiup PGI Greenlandip suliffeqarfik Albatros Circlemut tuniniarlugu aalajangersimavoq.
PGI Greenland ukiuni sisamani kingullerni Ilulissani eqqaanilu takornarissanut pinngortitamik puigunaatsumik misigisassaqartitsisarpoq. Maannamit Albatros Arctic Circlep takornarissat angalatittalissavaat, Nunatsinnilu pinngortitaq kusanartoq takutittassallugu. Suliffeqarfinnit taakkunannga marluusunit tusagassiuutinut nalunaarummi tamanna atuarneqarsinnaavoq.
- Tunngaviusumik suliffeqarfik ingerlalluartoq misigisassarsiorluni angallassisarnernik oqittunik, kisiannili pitsaasunik qaffasissunik tigussavarput. Soorlu assersuutigalugu ilulissat akornanni qajartornerit, apummi kaminnik atorluni UNESCO-p nunarsuarmioqatigiinnut kingornussassanngortinnikuusaani Kangiani imaluunniit Ilulissat nunataani alianaatsumi qamuteralalluni takornariarneq, Albatros Arctic Circlep ineriartortitsinermut pisortaa Malik Milfeldt oqarpoq.
Albatros Arctic Circlep aningaasaliinerit Kalaallit Nunaanni pisut tassaniiginnarnissaat nuannaarutigaa, PGI Greenlandillu angalatitsisarnerpassuaminnit pitsaassuseq qaffasissoq atortagaat atorneqassasoq suliariniarpaa.
Aalajangerneq artornartoq
Suliffeqarfiup tuninissaanik aalajangerneq oqitsuinnaanngilaq. Pas Grau Internationalip pisortaa (PGI), Julio Ventaja nassuiaavoq.
- Uummatitsigut artorsarluta Ilulissat qimassavarput, aalajangernerlu oqitsuusimanngilaq, kisianni nunarsuup ilaani allani niueruteqarpugut, taakkualu ukiuni aggersuni tamakkiisumik sammissavagut.
Suliffeqarfiup iperarnissaa artornaraluartoq, Albatros Arctic Circlep suliffeqarfik tigulermagut PGI Greenlandip nuannaarutigaa.
- Taamaattorli suliffeqarfik suliamik ingerlatsilluartoq, Albatros Arctic Circle, suliffeqarfimmik tigusisussaammat piumasaqaataasullu qaffasissut naammassisinnaammagit nuannaarutigaarput, taakkumi misigisassarsiorluni angallassineq angallattakkallu kissaataat ilisimalluarpaat. Taakku tassaapput ineriartorluni alloriaqqittussat eqqortut, Joan Viladomat naggasiivoq.
Isumaqatigiissutip ilaatut AAC aalajangersimavoq PGI’p Ilulissani 2019-imi angalatitsinissai ingerlateqqissallugit.