Ilulissat: Aattartumi takornarianut illuaqqiat amerlissapput
Ilulissat Kangia UNESCO'p kingornussassanut allattorsimaffissuaniippoq, taamaammallu suut tamarmik nalilersorneqaqqissaartarput, sumiiffimmi pineqartumi nutaaliorniartoqaraangat. Taamaattoq Aattartoq takornarianut misigisassarsiorfittut periarfissarissaartutut nalilerneqarpoq. Maannalu takornarianut illuaqqiornissamik akuersisoqaqqammerpoq Namminersorlutik Oqartussat tungaannit akerliusoqaraluartoq.
Avannaata Kommuniata Namminersorlutillu Oqartussat akornanni pissaaneqarniunnermik pilersoqaqqajaasoqarpasippoq Ilulissat Kangiata ilorpasissuani Aattartumi takornarianut illuaqqiornissamik qinnuteqaateqartoqarnerata kingunerisaanik.
Avannaata Kommuniata takornariartitseqatigiiffiup kinaassusaa ersersinnagu qinnuteqaataa suliarisimallugu akuereqqammerpaa, taamaalillunilu qinnuteqarsimasoq 200 m2-mik illuaraliorsinnaanngorpoq takornarianik 28-nik unnuiffissaqartitsisumik.
Qinnuteqaateqartoqarnera tunngavigalugu kommune kommunemut pilersaarutinut tapiliussamik suliaqarpoq, taannalu suliarineqarpoq nunaminertamik nunaannarmi immikkut ornikkuminartutut toqqarneqarsimasoq Ilulissat Kangerluata eqqissisimatitap killinganiittoq Ilulissat qeqqaniik 35 km missiliorlugit ungasissuseqartumiittoq pineqarluni.
Takornarianut illuaraq kissaatigineqarpoq qangaaniilli puisinniarfiullunilu aalisarfiusup qanittuani, massakkut sanaartorfiusussanngitsutut nalunaarsukkamiilluni.
Niels Davidsen (IA): Tamanut inissaqarluarpoq
Avannaata Kommuniani Teknikkimut Ataatsimiititaliap siulittaasua, Niels Davidsen (IA) Sermitsiaq.AG-mut oqaluttuarpoq, sumiiffik pineqartoq takornariartitsiviit arlallit aammalu kommunip nammineq piniariartartunut illuaraataat tassaneereersut, taamaattorli kommunip naliliinera naapertorlugu nunaminertaq suli inissaqarluarpoq.
- Qinnuteqaat akuerinikuuarput, isumaqaratta nunaminertami pineqartumi nutaaliornissamut inissaqarluartoq. Sumiiffik pineqartoq UNESCO-p kingornussassanut allattorsimaffissuaqarfiata aammalu nunaminertap nalinginnaasup akornanniippoq, annertujaarmallu aporaattoqarani nutaaliortoqarsinnaalluni eqqissisimatitamut qanikkaluarluni, Niels Davidsen nassuiaavoq, taannali erseqqissaajumanngikkallarpoq illuaqqiornissamut qinnuteqarsimasut kikkuunersut.
