Ilulissat tipinikut imissanngortut

- Maanna imissat tunisassiat siulliit Kalaallit Nunaanni ilulissat ernganik pissarsiat piareerput.

Taama kalaallit suliffeqarfiutaanninngaanniit, Arctic Ice Cap Waterimit, ukiuni arlalinni ilulianik Qeqertarsuup Tunuani tipinikunik pissarsiornermik misilittaareersunik oqariartuuteqartoqarnerarlugu, Arctic Business Network allappoq.

Atuaruk: Ilulissat erngat takkutilerpoq

Puiaasat 20.000-it
Ineriartortitsinermik suliaqarneq ilaatigut Arctic Import peqatigalugu ingerlanneqarpoq, taannalu nassiussuisuussaaq.

- Tunisassiat siulliit puiaasat 20.000-iusut Kalaallit Nunaannut nassiunneqaqqammerput, kalaallit pisisartut siullerpaallutik tunisassiaq misilissaavaat, Arctic Importimi pisortaq Allan Frost oqarpoq.

Arctic Importip Arctic Ice Cap Wateri Kalaallit Nunaanni nassiussorneqarnerani Pilersuisoq suleqatigineqarpoq.

Bakteeriaqanngitsut
Tunisassiornerli arlalissuarnik unammillernartoqarsimavoq - minnerunngitsumik eqqiluisaarnerup tungaatigut. Imissaq bakteeriaqanngiivittussaavoq. Sermip piiarneqarneranut aamma Danmarkimut pisariaqartumik maqinneqarfissaanut angallassisariaqarnermut annertuumik piumasaqaatinik nassataqarsimavoq.

Matoqqasoq
- Suleriaatsimik matoqqasumik pilersitsinikuuvugut, imeq suliarineqarnera tamarmi inuup assaanik attorneqanngitsumik, Arctic Ice Cap Waterimi pisortaq, Peder Pedersen bloggimut nassuiaavoq.

Tunisassiorneq pisarpoq, Arctic Ice Cap Waterip prammimik ilulissanut tipinikunukarnerisigut, tassanngaanniillu qillerinerisigut. Sermeq sequtsigaq containerimut pumperneqartarpoq, maqiterivimmullu nassiunneqartarluni.

Avammut niuerneq
Imeq avammut tunisassiarineqarnissaa siunertaavoq, kisianni oqaatigissallugu siusippallaarpoq tamanna qaqugu pissanersoq.

Aamma atuaruk: Sikuminerit Kangiamiunut iminngorlugit tuniniarneqartalissapput