Ilulissat Røde Korsiat aatsaat taamak juullimut ikiuitigaaq
Ukioq 2021 naammassiartuaaleqaaq. Juullimut tipaatsunneq annertusiartorpoq namminerlu kajumissutsiminnik ikiuisartut ilaqutariinut utoqqarnullu pissakinnerusunut tunioraaleruttorput. Ilulissat Røde Korsiat Qasigiannguaniit Siorapaluk tikillugu 350.000 koruunit nalinginut ilaqutariinut tuniorarpaat.
Ukioq manna Ilulissat Røde Korsianut immikkuullarilluinnarpoq. Qasigiannguaniit Siorapaluk tikillugu illoqarfinnut nunaqarfinnullu aatsaat taama aningaasat amerlatigisut pissakinnerusunut tuniorarpai. 350.000 koruunit agguarneqarput.
- Tanngassimaarutigeqaarput nuannaarutigalugu taama amerlatigisut juulleriartornerani ikiorsinnaasimagatsigit. Ilaqutariit amerlanerpaat ikiussallugit aalajangersimavugut. Tassunga tunngatillugu annertuumik suleqatigisatsinnut tapiissuteqartunullu ukununnga Lions Ilulissat, Nuna Fonden, Paula og Axel Nissens Legat inuit ataasiakkaallu tapiissuteqartartut qutsavigerusuppagut, Ilulissat Røde Korsiani siulersuisut siulittaasuat, Karen Buus oqarpoq.
Suliniutit allat iluatsilluartut
Aningaasaliisartut saniatigut Røde Korsip Ilulissani pisiniarfia aamma aningaasanik isertitsiffiusarpoq. Tassanimi atisat, pinngussat igaffimmilu atortut pisiarineqarsinnaasarput. Taakkualu akigineqarnerini avannaa tamakkerlugu sunniuteqarput.
- Pisiniarfimmi atisanik illoqarfinnut nunaqarfinnullu nassiussassanik aamma poortuisarpugut. Taakkua Kalaallit Nunaata avannaa tamakkerlugu nassiunneqartarput, Karen Buus oqarpoq.
Meeqqanut angerlarsimaffimminniit taquartinneqarsinnaanngitsunut Røde Kors aamma ullut tamaasa ukioq manna ullaakkorsiortitsisarpoq. Meeqqanut ullaakkorsiortitsisarnerit suliffeqarfiit qanimut suleqatiginerisigut piviusunnngorsinnaasimavoq.
- Atuarfimmi ullut tamaasa ullaakkorsiortitsisinnaanerit piviusunngorsinnaasimavoq annertuumik NDO Supply A/S-imiit aamma AirZafari Greenland Aps-imiit ikiorneqarnitsinni. Ilulissat Røde Korsianiit namminneq kajumissutsiminnik sulisartut suleqatigisagullu annertuumik qutsavigerusuppagut. 2022 qilanaaraarput, Ilulissat Røde Korsiani siulittaasoq oqarpoq.