Ilulissat eqqaanni ajunaalernermut kalerrusaarutinik takunnittoqartoq
Politiit aamma Issittumi Sakkutuut suleqatigiillutik SAR-mik ujaasisoqarpoq ippassaq sapaatiummat.
Ilulissat eqqaanni iluliarsuarnit Ilimanap tungaanut ajunaalernermik kalerrisaarutinik aappaluttunik aallartitsisoqarsimasoq pillugu vagtcentralimut ippassaq sapaatiummat nalunaaqutaq 19.41 nalunaartoqarpoq.
Taamaattumik Ilulissani Politiit Arktisk Kommando peqatingalugu Ilulissat eqqaani iluliarsuit tungaanni ujaasineq aallartippaat, angallatit aammalu timmisartoq S-61 atorlugit.
- Ilulissani Politiit inummik maqaasisaqartoqarsinnaaneranik ilisimasalinnik ujartuipput, massakkumuungallartoq ilisimaneqanngimmat inunnik maqaasisaqartoqarnersoq. Aammattaaq ajunaalernermut ingeriuttakkanik aappaluttunik allanik takusaqartoqarsimanersoq imaluunniit arlaatigut ilisimasaqartoqarnersoq Ilulissani Politiit ujartuipput, politiit Facebookimi quppernerminni allapput.
Ilulissani Politiit oqarasuaateqarput telefon 70 14 22.