Ilulissaniit piniartut: Qernertanik qilalugartassat naapertuunnerusumik agguaassigit
Avannaani illoqarfiit annersaanni Ilulissani aalisartut piniartullu illoqarfinnit saniliminniittunit ikinnerujussuarnik qernertanik qilalugartassinneqarnertik naammaginngilaat.
Naalakkersuisut januaarip 3-ani 2020- mut qernertanik qilalugartassat saqqummiummatigit Ilulissat arfernik 19-inik pisassinneqarpoq, tamannalu ukiorpassuarni tallimanik pisassinneqartarneranniit annertuneruvoq, kissaatigisaannillu arfernit 75-init ikinnerujussuullutik.
Aviisi Sermitsiaq taama allappoq.
Tamanna pivoq naak Ilulissani aalisartut piniartullu peqatigiiffiat ukiorpassuarni illoqarfigisaminnut qilalukkanik qernertanik amerlanerusunik innersuussigaluartut. Ilulissanili aalisartorpassuaqartumi piniartorpassuaqrtumilu qernertanik qilalugartassat tallimaniit amerlanerusarsimangnillat, tamanna aatsaat ukioq manna pivoq.
Avannaani illoqarfiit annersaanni aalisartorpassuaqarlunilu piniartorpassuaqartumi qilalukkanik qernertanik ukiumut pisassaq ataasivoq, taama marlunngorput, tallimanut amerlineqarlutik maannalu 19-inngorlutik. Taamaalinerani illoqarfiit sanilitik ukiut tamaasa katillugit 200-nit amerlanerusunik pisassinneqartut takusarlugit, qilalugarpassuit qernertat Vajgatimi pisarineqartarlutik, Ilulissaniit sinerissmailu sumiiffinnit allaniit aalisartut piniartullu tassunga piniariakulasarlutik. Ukioq manna Uummannaq 140-nik qernertanik qilalugartassinneqarpoq, Qeqertarsuullu tunuata kujasissortaa Qeqertarsuarlu 2020-mi 80-inik pisassinneqarlutik.
Ilulissani aalisartut piniartullu peqatigiiffiata paasiuminaatsippaa sooq piassat illoqarfimmiit illoqarfimmut taama assigiinngitsiginersut.
– Sooq illoqarfimmiit illoqarfimmut tamatigut taamak assigiinngitsisunik pisassiisoqartarnersoq paasiuminaatsipparput, aamma naak illoqarfiit eqqaamiorigaluarlugit. Tusarniaasoqaraangat naapertuunnerusumik pisassiisoqartarnissaa tamatigut qinnutigisarsimagaluarparput allanngortoqanngisaannarporli. Tamannalu aamma ilaatigut peqqutigalugu maani Nuummiikkaangatta aalisarnermut piniarnermullu Naalakkersuisoqarfimmut saaffiginnissutigisarparput, qernertanik qilalugartasseeriaaseq oqaluuseriniarlugu, Ilulissaniit Johan Villadsen aamma Hans Otto Sandgreen aalisarnermut ataatsimiititaliarsuup decembarip 12-ani 2019-imi oqallitsitsinerani Nuummiittut aviisimut Sermitsiamut taama oqarput.
Aviisimi Sermitsiami atuarnerusinnaavutit. Aviisi uani pissarsiariuk: