Angallanneq
Ilulissani ukiukkut angallannermi inatsisit ersarinnerusut
Ulluni makkunani ukiukkut angallatit qimussit, qamuteralaat kiisalu illiniliutit naggataalerunaleraluartut tullissaani ukiornissaanut ersarinnerusunik inatsisitigut tamakkununnga tunngasut inissinneqassasut Qaasuitsup Kommuniani piumaneqarput
Qeqqata kommuniani Sisimiuni suliniutigineqartoq ukiukkut angallatigineqartartut qamuteralaat aamma illiniliutit nunap timaatigut angallatiginissaat akuerisaalersoq Ilulissani Inuit Ataqatigiit atuarlugu nuannaarutigaat. Qaasuitsup Kommunianilu aamma taamaaliortoqarnissaa kissaatigineqarpoq, ukiukkut angallanneq tamanut eqaannerulerniassammat.
- Ukioq manna malunnarsimmat illoqarfipput Ilulissat soorlu millisimasoq. Qimussimik aallarniarluni mianersornissaq pisariaqarluinnarpoq. Aqqutaanimi mianersuutassat tassaagamik: biilit, qamuteralaat, sisorartut kiisalu pisuttuartut, Karo Thomsen Fleicher Ilulissani Inuit Ataqatigiinneersoq tusagassiuutinut allappoq.
Tamanut inissaqartitsineq
Qimussertut ingerlaniartillutik aqqusinikkoornissaq pinngitsoorsinnaanngilaat, taamaattumik ilaannikkut biilertut eqqumaffiginngitsoornerat pissutaalluni qimussimik apuisinnaasarput. Qimussimik aamma ingerlatilluni qamuteralaat qimussillu apungajattarput. Aamma sillimanngitsooraanni sisorartunik kiisalu pisuttuartunik aqqunartoortoqarnissaa qanittarluni.
- Inooriaaseq allanngorpoq, tamattali inissaqartariaqarpugut. Tamanna massakkut suliniutigineqartariaqarpoq. Issittumi ukiukkut periarfissaasut tamatta eqqissilluta atorusuppavut. Imaassanngilaq inatsisit ersernerlunnerata peqqutigisaannik inuit sunngiffimminni soqutigisartik pissutigalugu aporaatilersut, Karo Thomsen Fleischer oqarpoq.