Ilulissani uiverneq

Ilulissani unnuiffissat tamarmik ulikkaaqqanerini timmisartunut ilaasussat aallarneq ajuleranerat uivertitsivoq. Inuit halini madrassini sinittarsimapput.

Kåre Hendrikseni ukiuni arlalinni Nunatsinni angalasarsimavoq. Silallu pissusaata kingunerisaanik kinguaattoornerit tassunga nutaarsiassaanngillat. Taamaattoq massakkut taama pisoqarnera allaaneruvoq.

- Ukiuni 35-ni Kalaallit Nunaanni aatsaat taama uivernermik misigisaqarpunga, taanna Sermitsiaq.AG-mut oqarpoq.

Suut tamarmik ulikkaaqqasut

Taama tukatsigisumik pisoqarnera, Upernavimmi Uummannami Aasianni sapaatip-akunneratalu aallartilaarnerani Ilulissani pujornera pissutaavoq.

Tamatuma kinguneraa Avannaani ilaasussat 350-it unittooqqaneri. Amerlanersaat Ilulissaniipput.

Takornarissallu tikerarnerisa nalaani unnuiffissaaleqiffiuvoq.

- Init tamarmik inniminneqarnikuupput, taamaattumillu ulikkaaqqalluta, Hotel Hvide Falkimi saaffiginnittarfimmiu oqaluttuarpoq.

- Ullut kingulliit marluk inuit 22-it inersuarmi paarlerniissimapput, taanna nangilluni oqaluttuarpoq.

Qipeqaratik madrassiniittut

Hotel hvide Falkilu kisimiinngilaq. Illoqarfimmimi akunnittarfiit tamarmik ulikkaaqqapput.

Tamannalu pissutigalugu inuit illoqarfimmi halini qipeqaratik akiseqaratilluunniit madrassiniittariaqarsimapput.

- Ilulissani unnuiffiusinnaasut tamarmik ulikkaaqqapput, taamaammat aaqqissutissanik nassaarniarnerput ajornakusoorsimalluni. Inuit halini innartittariaqarnera pinngitsoorsinnaasimanngilarput, Kathrine Hjeholt Nathanielsen, Air Greenlandimi attaveqatigiinnermut pisortaq oqarpoq.

Timmisartut aallartinniarsarigaat

Ilaasussat sumi unnuissanerlutik qaqugulu aallaqqissanerlutik paasitinneqarnissamik ajornakusoortitsisimapput.

- Inuit angallaffiunerpaanerat nalliuteruttorfiani pimmat ajornartorsiortitsivoq, tamannalu aaqqissutissanik ujartuisarneq naliginnaasumit sivisunerusumik ingerlanneqartarluni. Aallartussat aaqqissuunniarneri ajornakusoorneroqaaq, Kathrine Hjeholt Nathanielsen oqarpoq.

Ullaaq mannalu tusagassiuutinut nalunaarummi Air Greenlandip nittartakkamini sukumiinerusunik paasissutissaqartoq tikkuaavoq.

Paasissutissanik pissarserusuttut

Tassanilu paasissutissat aamma amingaatigineqarput. Kåre Hendriksenillu timmisartoq Qaanaamut ilaaffissani 12.40 aallartussatut pilersaarutaasoq takusinnaasimavaa.

- Allamiillu paasitinneqarpunga timmisartoq taanna aallarnianngitsoq, taanna ulloqeqqata-tungaa oqaluttuarpoq.

Paasissutissarli eqqortuusimavoq; timmisartuussinissap angalanissaa taamaatinneqarsimavoq.

- Timmisartuussinerit pisinnaasarput tamaat ingerlanniarsaraagut, kisiannili ilaasussat qaqugu aallarnissaat pillugu siusinaarluta nalunaarfigisinnaaneq ajorpagut, Kathrine Hjeholt Nathanielsen nassuiaavoq.

Utaqqisut

Tamannalu ima kinguneqarpoq, ilaasussat arlaannik susassarsiorsinnaangaluarlutik mittarfimmi utaqqisariaqartarlutik.

- Paasisinnaavarput ilaasussat qaqugu aallassanerlutik nalullugu kamakkaluarpata.

Air Greenlandip nittartagaani takuneqarsinnaavoq Ilulissaniit Upernavimmut Aasiaannullu timmisartuussinerit iluatsissimasut, kisianni Qaanaamut, Uummannamut Qaasunullu timmisartuussinerit taamaatinneqarsimasut.

Powered by Labrador CMS