Ilulissani tunillatsittoqarsimasumik paasinnittoqarpoq - Nuummiit timmisartuussinissat unitsinneqarput

Ilulissani inuk ataaseq Nuummilu ataasiinnaanngitsoq coronavirusimik tunillatsissimapput.

- Nuummi tuniluuttoqarpoq Ilulissanilu inuk ataaseq tunillatsissimavoq, taamatut oqarpoq nunatsinni nakorsaaneq Henrik L: Hansen marlunngornermi ullup-qeqqata siorna tusagassiortunik katersortitsisoqarmat.

Nunatsinni nakorsaanerup tusagassiortunik katersortitsinermi oqaatigaa, inuit tunillatsissimasut siusinnerpaamik arfininngormat tunillatsissimassasut. Nuummi inuit tallimat Ilulissanilu ataaseq tunillatsissimapput. Tunillatsissimasunit pingasut timmisartoqarfiliortuupput.

Nuummi ajornartorsiutaasoq tassaavoq, tunillatsissimasut marluk sapaatip akunnerata naanerani kaffillertuniissimallutillu apersortittoqarneranut peqataasimanerat.

Ilulissani pisoq maannakkorpiaq misissuiffigineqarpoq. Tunillatsissimasorlu ippassaq Ilulissanut tikissimalluni, aamma misissuinerni inuit timmisartoqarfiliortut siulliunneqarput.

- Ullumi kikkut tunillatsissimasinnaanersut paasissavarput, taakkulu ulluni qaninnerni misissorneqassapput. Tigussaasumik pilersaarutissaqalerutta erseqqinnerusumik nalunaaruteqarumaarpugut, Henrik L. Hansen oqarpoq.

Imaatigut silaannakkullu angallanneq unitsinneqartoq

Nuummiit silaannakkut imaatigullu angallannerit tamarmik unitsinneqarput, nunatsinni nakorsaaneq tusagassiortunik katersortitsinermit oqaluttuarpoq.

Tamatuma saniatigut illoqarfiit pingaarnersaannik allatigut matusisoqanngilaq.

Timmisartoqarfiliortoqarneranut atatillugu mattusimaannartoqarnissaanik ingerlatsiniarnerup nalaani mattusimaffiup avataani tunillatsittoqarsimasoq paasineqarmat taamatut nalunaaruteqartoqarpoq.

Tunillatsissimasinnaasunik ujaasisoqartoq

Nunatsinni nakorsaanerup oqaatigaa, Nuummi inuit sapaatip akunnerata naanerani tunillatsissimasut najuuffigisimasaanni kaffisoriarlutillu apersortittunut peqataasimasut attaveqarfiginiarlugit sulisoqartoq. Tunillatsissimasut inuit 200-t angullugit issiaqatigisimasinnaavaat, nunatsinni nakorsaaneq naliliivoq.

- Tunillaassuineq manna aatsaat aallartilaarpoq, tamatumalu siaruaatinnginnissaanut periarfissaqarluarpugut, Henrik L. Hansen oqarpoq.

- Tuniluunnerup siaruaatinnginnissaa pingaaruteqarluinnarpoq, siaruaatissappammi akiuussutissalersuineq ajornarsisinnaavoq, taanna nangilluni oqarpoq.

Nunatsinni nakorsaanerup erseqqissaatigaa, nalliuttorsiualaarnernut peqataasoqarsimasinnaasoq tunillatsissimasunut qanillisimanngikkaluartunik.

Nuummi misissuisarfik nal. 12.30 ammarneqassaaq. Inuit 200-t angullugit ullumikkut misissortissinnaapput.

Malittarissassanik unioqqutitsisoqarsimanersoq uppernarsaatissaqartinneqanngitsoq

Nunatsinni nakorsaanerup oqaatigaa, tuniluuttoqalerneranut atatillugu mattusimasussaanermut malittarisassanik unioqqutitsisoqarsimanersoq maannakkorpiaq uppernarsaatissaqartinneqanngitsoq.

Naak tunillaasimaneq Munck-gruppenimi sulisunit mattusimasussaasunit aallartissimasinnaagaluartoq.

Nunatsinnimi nakorsaanerup nassuiaatigaa, sulisut Kalaallit Nunaannit aallartussaagaangamik, timmisartoqarfiliorfiup eqqaani najugaqarfimmit anisinnaasartut.

Timmisartoqarfiliornerit maannamut ingerlanneqarallaannassapput.

Corona sorliunersoq ilisimaneqanngitsoq

Nunatsinni nakorsaanerup oqaatigaa, coronavirusi sorliunersoq suli ilisimaneqanngitsoq. Naatsorsuutiginerarpaali ulloq ataaseq ullulluunniit marluk nallertinnagit ilisimatitsissuteqarsinnaalluni.

Asii Chemnitz Narupip tusagassiortunik katersortitsinermi sakkortunerpaamik kaammattuutigaa, akiuussutissalertinnissamut neqeroorfigineqartut tamarmik akuersaarumaartut.

Tunillatsissimasut nutaat akornanni napparsimaruluttoqanngilaq, ippigisaqarpulli. Inuuusuttut qaqutiguinnaq napparsimarululersinnaasut matumani pineqarput.

Inuk ataaseq suli peruluttut uninngavianni uninngavoq, taannali inuunerminik ulorianartorsiunngilaq.

Powered by Labrador CMS