Ilulissani toqutsineq ima pivoq

Angummik 24-nik ukiulimmik toqutsisimasutut agguisimasutullu unnerluutigineqartoq sivisussusilerneqanngitsumik immikkut paarisassanngortinneqassoq unnerluussisussaatitaasup piumasaraa. Siorna Ilulissani toqutsisoqarneranik suliap uissuumminartup unnerluussissutaani tamanna atuarneqarsinnaavoq.

Ilulissani peqqarniilluinnartumik toqutsisoqarnera pillugu unnerluussissut piareerpoq, suliarlu novembarip naanerani Ilulissani eqqartuussivimmi suliarineqassaaq.

Unnerluutigineqartup pinerliffigisani 29. september 2021-imi piffissami nal. 00:15 aamma nal. 11:00 akornanni Ilulissani qanoq toqussimasinnaaneraa, unnerluussissummi nassuiarneqarpoq.

Qanoq toqutsisimanera ilisimaneqanngilaq, kisianni niaquata anaalerneranik, savimmik kapoorneranik imaluunniit qungasiata kipineratigut toqussimasinnaagaa, unnerluussissummi atuarneqarsinnaavoq.

Unnerluutigineqartup pinerlineqartoq toqoreeramiuk niaquata tunuatungaatigut aammalu pukusuata nalaatigut qasseeriaqaluni kapoorsimavaa, taamatullu unnerluussissut naapertorlugu toqusimasup timaa niaquatigut, niuatigut, taliatigut, timitaatigut aammalu ilormiuatigut aggorsimavaa, pinerluffiusullu eqqaani eqqaavimmut igippai, taakku kingornatigut Ilulissani ikuallaavimmut ingerlatinneqarput.

Unnerluutigineqartup illersuisuanit suliaq pillugu Sermitsiaq.AG oqaaseqartitsiniarluni sulissuteqarpoq.

Nakuusernermik sulianut arlalinnut unnerluutigineqarsimasoq

Unnerluunneqartoq toqutsinerup saniatigut marloriarluni nakuusersimasutut aamma unnerluutigineqarpoq.

Aappaa Ilulissani 13. februar 2020-imi pisimavoq.

Sivisussusilerneqanngitsumik paarisassanngortitsineq atorneqarsinnaavoq, ima pisoqarpat

1) iliuuseqartoq pisuutitaappat toqutsinermut, ujajaanermut, kiffaanngissusiiaanermut, annertuumik nakuuserluni pinerlunnermut, § 98-imi eqqaaneqartutut sioorasaarinermut, pinngitsaaliilluni atoqateqarnermut imaluunniit allamik kinguaassiuutitigut annertuumik pinerlunnermut imaluunniit ikuallatsitsinermut imaluunniit pinerluutinik taaneqartunik tamakkuninnga iliuuseqariaraluarnermut,

2) pinerluutigisap qanoq ittuunera aamma pineqartoq pillugu paasissutissat, pingaartumik siusinnerusukkut pinerluutigisimasai, tunngavigalugit isumaqartoqartariaqarpat pineqartoq inuit allat inuunerannik, timaannik, peqqissusaannik kiffaanngissusaannilluunniit navialisitseriataarsinnaasoq, aammalu

3) navialisitsineq tamanna pinaveersaartinniarlugu immikkut isumagisassanngortitsinerup atorneqarnissaa pisariaqarpat.

Unnerluunneqartup tassani pinerluffigisani amerlassusilerneqanngitsumik niaquatigut timaatigullu isimmigarlugulu patittarsimavaa passunneqartarialimmik ajoquserlugu, ilaatigut najungasui arlallit napillugit aammalu puaatigut aanaalersillugu.

Pisup aappa ukioq manna 7. januar inissiisarfimmi pivoq, unnerluutigineqartup tassani inuk tigoriarlugu natermut naloriuppaa najungasuatigullu seeqqormittaarpaa.

Aammattaaq unnerluutigineqartoq Danmarkimi Nykøbing Sjællandimi biilinik aallarussisimasutut unnerluutigineqarpoq, biilersinnaanermullu allagartaqarani biilersimasutut unnerluutigineqarluni.

Pinerluttulerinermik inatsimmi 161 naapertorlugu piffissami aalajangigaanngitsumi immikkut paarisassanngortitsineq kiisalu biilinik aallarussinermut atatillugu taarsiissuteqarnissaa unnerluussisussaatitaasup piumasaraa. Toqutsinermik suliami qimagaasut taarsiivigineqarnissamik piumasaqaateqarsinnaanerat aamma sillimaffigineqassasoq, unnerluussisussaatitaasoq tamatuma peqatigisaanik ilisimatitsivoq.

Powered by Labrador CMS