Ilulissani timip toqungaasup ilaanik nassaartoqaqqittoq

Ilulissani ikuallaaviup sumiiffigisaani timip toqungasup ilaanik nassaartoqaqqippoq.

Kalaallit Nunaata Politiivi Sermitsiaq.AG-mut taama uppernarsaapput.

Politiit ilisimatitsipput arfininngornerup unnukkuanili nassaartoqaqqaarneranit timip ilaanik nassaartoqaqqissimasoq. Paasiniaaneq pissutigalugu timip sukuttaata ilaa nassaarineqarsimanersoq oqaatigineqanngilaq.

Ilulissani ikuallaaviup eqqaa matuneqaqqagallarpoq misissuisoqarnerani. Ikuallaavimmi sulisoq arfininngormat nassaaqqaartuuvoq, politiinullu kalerriilluni.

Danmarkimiit toqusoqarsimatillugu misissuisartut Ilulissanut aqagu tikissangatinneqarput.

Suliami tigusarinnittoqarsimanngitsoq sulilu pasisaqartoqanngitsoq, politiit attaveqatigiinnermut immikkoortortaqarfia ilisimatitsivoq.

Innuttaasut ikiuunnissaat pisariaqartinneqarpoq

Politiit innuttaasunik suliamut tunngasumik ikiuussinnaasunik attavigineqarnissaminnik piumasaqaqqipput. Innuttaasut illoqarfiup iluani eqqaavinnik ingitsiffiusartut containerit eqqaanni pasinarsinnaasumik takunnissimasut politiit oqaloqatigerusuppaat. Nassaarineqartummi illoqarfiup eqqaaveqarfiineersinnaanerat politiit aamma eqqarsaatigisimavaat.

- Innuttaasut illoqarfiup iluani eqqagassanik igitsisarfiit containerit eqqaanni pasinarsinnaasunik nalinginnaarpasinngitsunillu takusaqarsimasinnaasut oqaloqatiginissaat soqutigilluinnarparput.

- Pingaartumik innuttaasut sumiiffimmi nalinginnaasumik igitsisanngitsunik takusimasut, imaluunniit piffissami eqqumiitsumi angallassillutik eqqaajartorsimasunik takusimasut, paasiniaasut pisortaat Jan Lambertsen oqarpoq.

Innuttaasut illoqarfiup iluani eqqaaveqarfinni containerit eqqaanni piffissami 27. september aamma 2. oktober akornanni pasinarsinnaasunik takunnissimasut politiinut tlf. 70 1448-mut saaffiginneqquneqarput.

Politiet ilanngullugu ilisimatitsissutigaat maqaasineqartumik suli nalunaartoqarsimanngitsoq.