Ilulissat
Ilulissani sakkulerluni ujajaariartoqarpoq
Ilulissani aqqusinermi Illumiuni pisiniarfeeraq sakkulerluni ujajaariarfigineqarpoq
Arfininngornermi ualikkut sakkulerluni Ilulissani ujajaariartoqarpoq pisiarfeeqqami sulisoq aallaammik qunusaarlugu aningaasanik tunniussiteriarneqarmat. Ujajaariartut suli tigusarineqanngillat.
Ujajaariarneq Illumiut aqqutaani pisiniarfeeqqami pivoq ujajaariartup aappaa kiinarpalik aallaammik qunusaaraluni sulisoq aningaasanik tunniussiteriarmagu ujajaariaqatini matumi sissuertoq. Sulisulli ingerlaannaq oqarasuaat tigusinnarlugu politiinut sianersimasoq taamaasimmallu ujajaariartut kiinarpaqartut avannamut qimaasimapput Uiarsaariap Enok Kristiansenillu aqqutaata akornanni inuinnaat aqqutaatigut tummeqqatigut sungaartutigut.
Suli tigusarineqanngillat
Ujajaariartup aappaa imatut oqaluttuarineqarpoq: Angut inuusuttoq kalaaleq, 170-175 centimeterisut angitigisoq nerinnattuunanilu tuattuunngitsoq. Taanna ataasiaannaq atortakkamik atallaaqarsimavoq nasaasalimmik. Qaqortumik kiinarpalersimasoq isaasa qarngatalu nalaanni putuneqarsimasumik. Aaqqateqarsimassagatinneqarpoq. Nassataraa nammattagaq sinaatungimigut qasersoq aappalungusesoq. Aallaat qasersoq plastikimik timitalik nassarpaa.
Ujajaariartup aappaa imatut oqaluttuarineqarpoq: Angut inuusuttoq, kalaalerpaluttumik isikkulik 170- 175 centimeterimik angissusilik tuattuunanilu nerinnattuunngitsoq. Qernertumik jakkeqarpoq qernertunik qarlippaaqarluni aaqqateqassangatinneqarlunilu. Nammattagaqarpoq qernertuusorineqartumik.
Ilulissani politiit takunnissimasinnaasunik imaluunniit ujajaariarnermut paasissutissaateqarsinnaasunik oqaloqateqarusupput. Politiit attavigineqarsinnaapput oqarasuaat 701422 imaluunniit mobil 543822 atorlugit.