Ilulissani pinerluuteqarsimasunut inissiisarfimmut inissitaq qimaasimasoq
Politiit angut 40-nik ukiulik Ilulissani inissiisarfimmiit arfininngormat qimaasimasoq ujaaraat.
Angut Ilulissani inissiisarfimmiit qimaasimasoq, Kalaallit Nunaanni Politiit tusagassiorfinnut nalunaaruteqarnermi ilisimatitsipput.
Angut pineqartoq tassaasoq Jens Kruse arfininngormat ualikkut tallimat eqqaanni Ilulissanit inissiisarfimmiit qimaasimavoq.
Jens Kruse imatut isikkoqarpoq:
Angut 40-nik ukiulik, 170-175 cm missaannik angissusilik, qapeqqasoq, tuattumik/nalinginnaasumik timilik, inissiisarfimmiit qimaagami qernertunik qalipaatilinnik qarleqarpoq Adidasimiillu tujuuloqarluni nasartalimmik tungujortumik taartumik qalipaatilimmik.
Inuit pineqartup sumiinneranik ilisimannittut politiit pigaartuinut oqarasuaat 70 14 48 aqqutigalugu politiinut nalunaaqquneqarput.
- Erseqqissaatigissavarput, inissinneqarsimasunik qimaasimasunik ikiuineq pinerluttuliornerummat, aamma ikiorlugit toqqoqqatinneqarneri imaluunniit najugaqartinneqarneri pinerluttuliorneruppput, inatsit atuuttoq naapertorlugu eqqartuussivimmi sassartinneqarnermik kinguneqarsinnaasumik, politikommissæri Julie Senderovitz Bendtsen tusagassiorfinnut nalunaaruteqarnermi allappoq.
Politiit ilanngullugu erseqqissaatigaat, ujaarineqartoq nammineerluni tigusariniarneqassanngitsoq, takugaannili imaluunniit sumiittoq nalunngikaanni politiinut sianertoqassasoq.