Qaasuitsup Kommunia
Ilulissani paaqqinnittarfissaq kinguaattooqqasoq
Paaqqinnittarfimmik sanaartorneq sanaartornermut atortussiat assartorneqarnerisa kinguaattoornerinik eqqugaaqqavoq
Ilulissani paaqqinnittarfissaq katillugu meeqqanut 44-nut sulisunullu 13-inut inissaqartoq, pilersaarutit malillugit 1. oktober ammartussaangaluartoq kinguaattooqqavoq. Taamaammat ammarneqarnissaa novemberip qaammataanut kinguartinneqarpoq. Ullussaali qaquguussanersoq kommunip massakkut paasissutissiarisinnaanngilaa.
Ukiorlussimanera
Ukiorlussimanera kinguaattoornermut patsisit ilagaat, sanaartornermummi atortussiat sikoqarnera pissutigalugu piffissaq eqqorlugu apuunneqarsinnaasimanngillat Aasiannullu niuneqartariaqarsimallutik, Qaasuitsup Kommuniani allaffissornermut pisortaaneq, Hans Eriksen, paasissutissiivoq.
Kommunimi Paaqqinnittarfinnut, Kulturimut- Sunngiffimmilu susassaqarfinnut fagchef, Rie Johansen, paaqqinnittarfiup Novemberip qiteqqunnerani atorneqarsinnaalernissaa neriuutigaa.
Pisariaqartinneqartoq
- Paaqqinnittarfik pisariaqartinneqartorujussuuvoq, Ilulissanimi 1993-p kingornalu meeqqanut paaqqinnittarfiliortoqarsimanngilaq, fagchefi Sermitsiaq.AG'mut oqarpoq.
Taanna paasissutissiivoq, sanasut naammassiliivissut, kommunilu paaqqinnittarfimmut pequtinik nutserisinnaangajalertoq.
Atissaanik siunnersuuterpassuit
Qaasuitsup Kommunia nittartakkamini paasissutissiivoq, Kulturimut, atuartitaanermut sunngiffimmullu ingerlatsiviup meeqqeriviup taaguutissaatut siunnersuutit amerlasuut tigunikuuai. Taaguutitunik piukkunnartunik nassiussisut ullormi aammaanersiorfimmi aggersaassummik nassinneqarumaarput.
Paaqqinnittarfinnut, Kulturimut- Sunngiffimmilu susassaqarfinnut fagchef aamma paasissutissiaraa, Aasianni assigusumik aamma sanasoqarsimasoq, taannalu decemberip qaammataani atorneqalernissaat naatsorsuutigineqarpoq.