Ilulissani mittarfiup tungaanut aqqusinissaq milliuuninik pingasunik kisitsisitalimmik naleqassaaq
Ilulissani Qaqortumilu mittarfiup tungaanut aqqusinissat akii mittarfissuit pillugit naatsorsuutinut ilanngunneqarsimanngillat. Inatsisartuni illuatungiliuttut paaserusuppaat akiligassaq kikkut akilissaneraat.
Ilulissat nutaamik mittarfeqalerpat nutaamik aqqusineqalernissaq aamma pisariaqartinneqarpoq.
Aqqusinertaassamulli aningaasartuutissat mittarfissuarnut suliami naatsorsuutinut ilaatinneqanngillat.
Aningaasaqarnermut Ataatsimiititaliap Avannaata Kommunia ataatsimeeqatigisimavaa, tassanilu paasinarsivoq kommuni mittarfiup tungaanut aqqusinniornissamut akissaqanngitsoq. Aqqusinniornissamut akiligassaq koruuninik milliuuninik pingasunik kisitsisitaqartumik naatsorsuunneqarpoq. Avannaata Kommunia ukioq mannamut aqqusinernut, ikaartarfinnut, tummeqqanut assigisaannullu 6.121.000 koruuninik aningaasaliisimavoq, aqqusinertaassamullu 100 milliuunit koruuninik arlalinnik akeqartussamut sanilliukkaanni, maanna aningaasaliissutit annikipput.
Paasissutissat nutaat aallaavigalugit Aningaasaqarnermut ataatsimiititaliap ineqarnermut attaveqatigiinnermullu naalakkersuisoq aamma Naalakkersuisut siulittaasuat pinasuartumik siunersioqatigiumavai. Ataatsimiititaliarli siunersiuinerup kingorna nalunaaruteqarpoq paasissutissat naammattut pisimanagit.
Mittarfiit saniatigut aningaasartuutissat allat suli inissinneqannginnerat Inuit Ataqatigiit naammagisimaanngilaat.
- Kommuni imaluunniit Namminersorlutik Oqartussat aningaasarpassuarnik akiliisariaqassapput. Uagut sulissutigiumavarput Ilulissani aqqusinissamut aningaasartuutit kiap akilissanerai paasissallugu, Muté B. Egede (IA) oqarpoq.
Akiligassaq qanorpiaq annertutigissanersoq avammut suli saqqummiunneqanngilaq.
Akiligassaq uterteqattaarneqarpoq
Avannaata Kommunia isumaqarpoq Namminersorlutik Oqartussat akiliissasut, Namminersorlutilli Oqartussat isumaqarput akiligassaq kommunip akilissagaa.
Partii Naleraq aamma Inuit Ataqatigiit isumaqarput sanaartorneq aallartivitsinnagu tamanna inissilertorneqartariaqartoq.
- Mittarfissuit sanaartorneqarnissaanut unitsitsiniarsarinngilagut. Paaserusukkippununa aqquserngit sanaartorneqarnerinut kikkut akiliissanersut. Akiligassaq kommuniniinnersoq imaluunniit Namminersorlutik Oqartussaniinnersoq. Paasissutissat taakku pisagut tassa taamaapput, Pele Broberg oqarpoq.
Kommune Kujalleq Qaqortumi mittarfissap tungaanut aqqusinniornissamut aningaasaliissutissanik Namminersorlutik Oqartussanut aamma qinnuteqarsimavoq.
Ippassaq ataatsimiittoqarpoq
Avannaata Kommuniani borgmesteri Palle Jerimiassen (S) mittarfiup tungaanut aqqusinniornissaq pillugu aningaasaqarnermut naalakkersuisoqarfimmi ippassaq ataatsimeeqateqarpoq.
Sermitsiaq.AG-p Palle Jerimiassen ataatsimiinnermi angusarineqartut pillugit apersorusullugu saaffigaa. Saaffiginninnerli suli akineqanngilaq.