Ilulissani mittarfissaq takornariaqarnermut innarliisinnaasoq
Ilulissani mittarfissuaq ukiut marluk missaat qaangiuppata atulerpat takornariaqarnermik inuussutissarsiornerup ajalusoorluinnarneranik kinguneqarnissaa ernummatigineqalerpoq.
Ilulissani mittarfissuaq 2024-imi atulerpat Ilulissani takornariaqarnermut unammilligasanik annertuumik pilersitsinissaa politikerit takornarialerisullu ernummatigaat. Taakkumi isumaqarput takornariarnermik inuussutissarsiuteqarneq imarpik ikaarlugu mittarfissuartaarnissamut suli piareersimanngitsoq.
Aviisi Sermitsiaq taama allappoq.
Takornarissat umiarsuarnut takornariartaatinut ilaallutik Ilulissanut niusartut maanna amarlavallaartut taamaattumillu ullormut annerpaamik 1.000-it missaat sullinneqarsinnaasut Avannaata Kommuniani borgmester Palle Jeremiassen isumaqarpoq. Aammali Ilulissani Nuummilu mittarfissuartaarnissamut Kalaallit Nunaat piareersimanngitsoq, Ineqarnermut Attaveqaasersuutinullu Naalakkersuisoq, Erik Jensen, Siumut aamma Air Greenland A/S isumaqarput. Avannaata Kommuniani marluinnarnik takornariaqarnermut siunnersorteqarpoq, taakkulu takornarialerisunik tamakkiisumik qanimut suleqateqarnissaminnut iluamik nukissaqanngillat. Takornarialerisut peqatigiiffiat unittooqqavoq, takornarialerinermilu nutaaliorneq amigaataasoq Visit Greenland isumaqarpoq.
Taamaattumik mittarfissuartaarnissaq takornariaqarnermik inuussutissarsiuteqarnermut innarleeratarsinnaanera ernummatigineqarpoq.
Ernumanerli isumalluarnermik taarserneqassappat Kalaallit Nunaani takornariaqarfiit annersaanni Ilulissani takornarialerisut pisortallu maannakkorniit qaninnerusumik suleqatigiittariaqartut, takornariaqarnermik suliaqartut isumaqarput.
Aviisimi Sermitsiami atuarnerusinnaavutit. Aviisi uani pissarsiariuk: