Ilulissani mittarfiliorneq unitsikkallarneqartoq

Ilulissani mittarfiliorneq isumannaallisaanikkut ajornartorsiuteqarneq pissutigalugu ataasinngormat ualikkulli unitsikkallarneqarsimavow. Munck Gruppen Kalaallit Airports sinnerlugu mittarfiliortuupput.

Ilulissat Lufthavn

Ilulissani mittarfiliorfimmi maskiinat uninngapput. Ataasinngormat ualikkulli uninngalersimapput.

- Qaartartunut tunngatillugit isumannaallisaasoqarnissaanik unioqqutitsisoqarsimasoq ilisimatinneqarsimavugut. Taamaammat sanasut pissutsinik iluarseeqqinnissaasa tungaanut sanaartornerup unitsikkallarneqarnissaa aalajangersimavarput, Kalaallit Airportsimi pilersaarusiornermut pisortaq Aviaaja Karlshøj Knudsen Sermitsiaq.AG-mut oqarpoq.

Taassuma oqaatigaa, qaartartut atorneqartillugit pisortat malittarisassaliaat erseqqilluinnartut malinneqartussaasut. Sanasut aqutsisuisa tamanna maanna malitseqartinniarpaat.

- Neriuutigaarput qanittukkut sulineq aallarteqqikkumaartoq, maannalu suliniutitsinni isumannaallisaanerup ajunngitsumik ingerlanneqarnissaa ukkataraarput, pilersaarusiornermut pisortaq erseqqissaavoq.

Kaalallit Airportsimit naatsorsuutigineqarpoq, sulineq aallarteqqinneqariarpat kinguaattoorfiusunut angummateqqittoqalissasoq.

Powered by Labrador CMS