Mittarfik nutaaq
Ilulissani mittarfik tallillugu
Qaasuitsup Kommuniata Ilulissaniit Europamut Amerikamullu Avannarlermut timmisartukkut toqqaannartumik attaveqalernissaq piareersarpaa
Ilulissani mittarfiup 2.800 meterinut tallineqarnissaanik pilersaarutit ukiaq manna politikkikkut akuersissutigineqartussaagaluarput. Qinersisoqarnissaali suaarutigineqarmat tamanna unitsinneqarpoq. Taamatut allappoq borgmester Ole Dorph, Sermitsiami sapaatip akunnerani saqqummersumi atuartartutut allakkamini.
– Qinersinerup kingorna periarfissaqaliinnavippat politikerinik oqaloqatiginninnissaq kimigiiserfigissavarput, siuariartornermik suliffinnillu amerlanerusunik pilersitsinissamik suliaq aallartinniassammat, Ole Dorph allappoq.
Namminersorlutik Oqartussat, Qaasuitsup Kommuniata namminersortullu aningaasaliisut akornanni piffissamut sivisuumut suleqatigiiffissaq Newport-imik taaneqartoq, aallartinniarneqarpoq. Nunanit allanit misilittakkat takutippaat mittarfiit, inuiaqatigiit peqatigalugut aningaasarsiornikkut inerlanneqartut, piumassuseqarnermik aningaasaqarnikkullu siuartornermik pilersitsisartut, taanna tikkuaavoq.
Piareersarnerit pisariaqartut ingerlateqqinneqarput, sakkortuumillu sulissutiginiarparput mittarfiliup tallineqarnissaanut tunngavissaq sapinngisamik siammasissumik isumaqatigiissutigineqarluni aalajangiunneqassasoq, tamatumani ilanngullugu aningaasaliisartunut namminersortunut, pisortat-namminersortut akornanni piffissamut sivisuumut suleqatigiinnissamut pilerinnilersinnissaannut sinaakkutassanik aalajaatsumik aalajangersaaneq, borgmesteri nassuiaavoq.
Nunami tamarmi innuttaasut inuussutissarsiortullu Amerikamut Avannarlermut Europamullu sivikinnerusumik angalasalernissat iluaqutigissavaat, Ole Dorph naliliivoq, taannalu isumaqarpoq naalagaaffiup namminersortullu suliffeqarfiinut ingerlatsivinnullu pilerinartunngussasoq Ilulissaniilernissaq, Europap Amerikallu Avannarliup akornanni. Tamanna peqatigalugu Kalaallit Nunaat nunat tamalaat ataatsimiittarnerinut ataatsimeersuartarnerinullu ingerlatsiffigissallugu pilerinarnerulissaaq, nunarsuarmut tamarmut politikkersornermut atatillugu, aammattaarli Atlantikup illua'tungaanit tamanit ingerlatsivinnut suliffeqarfinnullu immikkoortoqarfilinnut sulisunullu akunnaatsumik ornittakkatut, Ole Dorph naliliivoq.
Pilerinartumi inissisimanera nunavissuillu akornanni sivikinnerusumik angalasalernissaq aammalu naammattunik akunnittarfeqarnera, neriniartarfeqarnera ataatsimeersuartarfeqarneralu pissutigalugit siuarinartornissamut periarfissat suli annertuseriarnerussapput, taanna tikkuaavoq.