Ilulissani mittarfik missingersuutinik aseruisinnaavoq
Kalaallit Nunaata mittarfinnik suliniussuata, 3,6 milliarder koruuninik akeqartussatut missingersuusiorneqarsimasup, aningaasalerniarnera ajalusooratarsinnaavoq.
Kalaallit Nunaata mittarfinnik nutaanik pingasunik sanaartorlunilu ilusilersuilluni manna tikillugu attaveqaatinik suliniutaasa annersaat anguniagaqarfiunersaallu, namminersorlutik oqartussat mittarfinnut selskabiannut Kalaallit Airportsimut, missingersuutigineqartunit 3,6 milliarder koruuninit akisuneroratarsinnaavoq.
Tamanna Sermitsiap paasivaa.
– Ajornartorsiutit annersaraat Ilulissat Mittarfiat, naatsorsuutigineqarmat taassuma sananeqarnera ajornakusoornerpaallunilu akisunerpaajussasoq. Nunani tamalaani entreprenøritut selskabersuarmit paasisaqarfik qaffasissumik atorfilik, kinaassutsiminik isertuusserusuttoq, Sermitsiamut oqarpoq.
Naatsorsuutigineqarpoq Nuummi Ilulissanilu mittarfiit sanaartorneqarnerat katillugit 2,6 aamma 2,8 milliarder koruunit akornanni akeqassasut. Paasisaqarfik naliliivoq Ilulissat Mittarfiata tallineqarnera minnerpaamik 1,4 milliarder koruuninik akeqassasoq. Tassa Kalaallit Nunaanni illoqarfiit pingaarnersaanni, Nuummi, mittarfiup tallineqarnerata naatsorsuutigineqartumik akissaanit 200 millioner koruuninik akisunerussalluni.
Missingersuutit qaangerneqannginnissaat taamaallaat qulakkeerneqarsinnaavoq mittarfinnik suliniutip qallunaat nunallu allamiut entreprenøriinut tallimat missaannik amerlassusilinnut suliarinnittussarsiuunneqarneratigut – suliarinnittussarsiuussinerlu sapinngisamik pitsaanerpaamik ingerlallugu. Taamatut isumaqarpoq Jóhannus Egholm Hansen, Kalaallit Airportsimi pisortaq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: