Ilulissani meeqqat atuarfimmi ullaakkorsiortinneqartalissasut

Ilulissani Kalaallit Røde Korsiata NDO Supply-illu peqatigillutik sulissutigilersimavaat, Ilulissani atuartut ullaakkut atuarnertik aallartitsinnagu peqqinnartunik inuussutissartaqarluartunillu ullaakkorsiortinneqartalernissaat.

Ilulissani nutaamik suliniuteqartoqarneratigut, meeqqat angerlarsimaffimminni ullaakkorsiorsimanngitsut tiimimi siullermi atuartinneqarnissaminnut qaarsilaarlutillu piareersimasarnissaat anguniarneqarpoq.

KRK Ilulissani siulittaasup Karen Buusip Ilulissani meeqqat ulloq atuarfiusoq anigussagunikku nukissaqartinneqarlutillu atugarissaartinneqarnissaat takorloortarsimammagu suliniut aallartinneqarsimavoq.

- Meeqqat atuartinneqarnissaminnut ilinniagassatullu takorluukkaminnik toqqaasinnaanissaminnut piareersimatinneqassapput, taamaaliornikkullu inuunissamittut takorloorsimasaminnik toqqaasinnaalissallutik, Karen Buus Sermitsiaq.AG-mut oqarpoq.

Ilulissani Kalaallit Røde Korsiat ilinniartitsisunit arlalerliarluni aperineqartarsimavoq, illoqarfimmi meeqqat atuartut nererusullutik atuariartortannginnissaat qulakkeerniarlugu suliniuteqarnissamut periarfissaqartoqarnersoq.

Ukioq atuarfiusoq tamakkerlugu ullaakkorsiorsinnaaneq qulakkeerneqartoq

Kalaallillu Røde Korsiata NDO Supply suleqatigalugu meeqqat ullormi atuarfissaq aallartitsinnagu ullaakkorsiornissamik pisariaqartitsisut ullaakkorsiortinneqartarnissaat sulissutigilersimavaat. AirZafari Greenland suliniummut ikiuulluni ullaakkorsiutissanik meeqqat atuartut ullaakkorsiortittalerniarpai.

NDO Supply-p ukiumi atuarfiusumi 2021 / 2022-mi tamarmi, issingigassanik myslitalinnik allanillu peqqinnartunik meeqqat nerisaqartarnissaat isumaginiarpaa.

- NDO Supply-mut pingaaruteqarpoq, Kalaallit Nunaanni meeqqat peqqinnartumik ulloqartinneqarnissaasa qulakkeerneqarnissaa, suliniullu manna aqqutigalugu meeqqat ullormik ajunngitsumik aallartitsinissaat qulakkeerinneqataaffigineqassaaq, tamanilli pingaarnerpaavoq - meeqqat atuartinneqarnissamut nukissaqartinneqarnissaat, NDO Supply-mik piginnittoq Jens Peter Mikkelsen oqarpoq.

Ilulissani Kalaallit Røde Korsianit neriuutigineqarpoq, suliniut iluatsilluarneqarumaartoq aamma Kalaallit Nunaanni tamarmi taamatut assigusumik suliniuteqartoqalerneranik nassataqarumaartoq.

Powered by Labrador CMS