Ilulissani meeqqat ataatsimeersuassapput
Nakuusa meeqqanik Ilulissani ataatsimeersuartitseqqilerpoq. Tamatumani qulequtarissavaat Peqqinneq Inuunerissaarnerlu
Nakuusa pingajussaa meeqqanik isumasiortitsilerpoq, meeqqat 13-init 18-it tikillugit peqataassallutik. Katillugit meeqqat 35-it peqataassapput.
Naalagaaffiit Peqatigiit 2030-mut anguniagaanni anguniagaq ataaseq ataatsimeersuarnermi qulequtarineqassaaq, anguniakkani taakkunani pingajuusoq tassaavoq Peqqinneq Inuunerissaarnerlu.
- Meeqqat namminneerlutik piffimminni qanoq atugaqarnertik nalunnginnerpaasaraat upperivarput. Taamaattumillu ataatsimeersuarneranni suut meeqqaniit qulequttamut tunngasut qaqinneqassanersut assut pissangagineqarput, tassami siullerpaamik aatsaat tamanna qulequtarineqalermat, Nakuusa tusagassiutinut nalunaarummi allappoq.
Siunissagissaartut
Siornatigut ilinniartitaaneq sammineqartarsimavoq. Maannali allamik sammisaqarusunneq Kommuneqarfik Sermersuumi Meeqqat Isummersorfiata aaliangiuppaa. Ilaatigut nunatsinni HIV-mik tuniluunneq eqqaaneqarsimalluni kiisalu inuttut nammineq killiliisinnaaneq peqqinnartutut isigineqarmat tamanna sammerusunneqarluni.
- Qulequtaq taanna toqqarneqarmat assut iluarisimaarpara, tassami inuttut inuiaqatigiittullu immitsinnut siuarsassagutta anersaakkut eqqarsartaatsikkullu nukittuujunissaq pingaaruteqarmat. Meeqqallu tamanna namminneerlutik kissaatigimmassuk torragaakka, takutiinnarpaammi siunissarput qaamasuusoq. Meeqqat pisinnaatitaaffitik maannamut sammisareerpaat, tassanilu eqqartortagaat sammisartagaallu qiviarutsigit peqqissumik inuuneqarnissap qanoq pingaaruteqarnera eqqummaariffigilersimagaat tulluusimaarnarpoq, Nakuusami suliamik aqutsisoq Najaaraq Møller tusagassiutinut nalunaarummi oqarpoq.
Suliassarpassuit
Ullut siulliit meeqqat inuttut imminut eqqumaffiginissaq, peqqinnartumik imminut pinissap isumaa, killit ersarissarneri assigiinngitsullu inuttut inerikkiartornermut tunngasut pikkorissarfigeqqaassavaat.
Marlunngornerminngaanniit pilersaaruseriuseq Sprint atorlugu pilersaarusiortinneqassapput. Ulloq kingulleq Naalakkersuisoq Martha Abelsen, Qeqqatta Kommunianit uddannelseschef Annga Lynge kiisalu Avannaata Kommuneata borgmesteria Palle Jeremiassen saqqummiussiffigineqassallutik.
- Kommunet allat aamma ataatsimeersuarnermi aallartitaqarput, taakku Nakuusap siunissamut ileqqaaffittut pilersaarusiarivaat, taamaattumillu immikkut kommunet qaaqquneqarsimallutik, ilisimatitsissutigineqarpoq.