Ilulissani inuk toqungasoq siumorneqarsimasoq
Sisamanngormat ullaakkut inuk Ilulissani inissiat ilaanni toqungasoq siumorneqarsimavoq. Politiit naliliipput nalinginnaasumik toqquteqarsimasoq.
Meeqqat Ilulissani sisamanngormat ullaakkut pinnguarnerminni inissiat ilaanni eqqumiigisaminnik takusaqarsimapput.
Ilullissani politikommisæri Palu Petersen Sermitsiaq.AG-mut ilisimatitsivoq.
Politiit taamaammat sisamanngormat ullaakkut arfininngulersoq ornigussimapput. Politiit inissiami inuk toqungasoq siumorsimavaat:
- Ilimagilluinnarparput nalinginnaasumik toqquteqarsimasoq. Misissuinitsinni pinerluuteqartoqarsimarpasinngilaq. Tamannali uppernarsarniarlugu toqusup timaata misissuiffigineqarnerani paasisat utaqqimaarpavut, Palu Petersen oqarpoq.
Ikiorsiinissaq aallartinneqartoq
Politiit toqusup ilaqutai kikkuunersut suli maannamut paasisimanngilaat, taamaammallu Palu Petersen pisimasoq pillugu allanik ilisimatitsissuteqarusunngilaq.
Toqungasup timaata siumorneqarnerani pissutsit pissutigalugit, poliit isumginninnermi oqartussanut saaffiginnissimapput, taakku toqungasumik siumuisunut ikiorsiissuteqassapput.