Ilulissani Hotel Icefjord silami naluttarfissamik pilersitserusuppoq
Ilulissani Hotel Icefjord sullitaminut silami naluttarfissamik saunartarfissamillu pilersitsinissamik pilersaaruteqarpoq. Alliliinissamik pilersaarutit kommunimi tusarniaassutigineqaleruttorput.
Avannaata Kommunia Hotel Icefjordip allilerneqarnissaanut suliniutissatut pilersaarummik tigusaqarsimavoq. Alliliinissamik pilersaarummi ilaatigut pineqarput, silami naluttarfiliornissaq, saunartarfiliornissaq, ikaartarfiliornissaq umiarsualivittoqqamillu iluarsaassinissaq.
Akunnittarfik siunertamut nunaminertamik tunineqassappat, suliffeqarfik Kalaallit Nunaanni siullersaalluni silami naluttarfiliorsinnaanngussaaq.
Kommunimi teknikkikkut ingerlatsiviup suliniutissatut siunnersuut tapersersimavaa. Kommunili suliniummut akuersitinnagut suliniut tusarniaassutigineqaqqaassaaq, susassaqartut assigiinngitsut sumiffimmut atatillugu soqutigisallit isummaminnik saqqummiiniassammata.
Qeqertarsuup Tunuanut isikkivilik
Nalunnguaarfissiamiipput silami kissassakkatut immamit imertalittut nalunnguaarfissiaq, aamma illu, tassaniissallutik perusersartarfik, atisalersortarfik, aamma sauna. Nalunnguaarfissiaq Qeqertarsuup Tunuanut isikkivilerlugu inissinneqassaaq, Avannaata Kommunia tusarniaassumi ilisimatitsissuteqarpoq.
- Hotel Icefjordimit niuerfimmi inissisimanerput ”imaata eqqaani pitsaasumik akunnittarfiuteqartutut” pitsanngorsaaffigerusupparput, timimik ilorrisimaartitsisarnermik tulattarfeqarnermillu ussassaarineq aqqutigalugit nunanit tamalaanit soqutiginnitsitsilerniarluta, otel Icefjordimi suliniummik allaaserinninnermi tunngavilersuutigineqarpoq.
Kommunalbestyrelsi aalajangiissasoq
Kommunip suliniummut nalunaaruteqarnissamut martsip 26-at killissaritippaa. Nunaminertamik atuinissamut siunnersuutit tiguneqartut allat pilersaarusiorluakkanik allaqqaakkatullu siunnersuummik imaqassapput.
Allatut qinigassatut suliniummut siunnersuutinut najoqqutassat tassaapput, atugarinissaa tassaassasoq akunnittarfimmik neriniartarfimmillu suliaqarneq, imaluunniit assingusut, kiisalu suliarisat tamakkununnga attuumassuteqartut, kommunimit oqaatigineqarpoq.
Tusarniaaneq nammassineqarpat kommunalbestyrelsip pilersaarummut ilassummik suliaqartoqassanersoq aamma Hotel Icefjord siunertamut nunaminertamik sunineqassanersoq aalajangiiffigissavai.
