Ilulissani eqimattatut tunillanneqarsinnaannginneq tikinneqalersoq

Avannaata Kommuniani peqqinnissaqarfiup qitiusumik immikkoortortaqarfiata naatsorsuuppaa Ilulissani innuttaasut 3.000-inik amerlanerusut coronavirusimik tunillatsereersimassasut. Arlallit peqqissereersimalerput.

Ilulissani innuttaasut 2.000-it sinneqartut PCR atorlugu misissuinermi tunillatsissimasut paasineqartareerput. Avannaanilu peqqinnissaqarfimmi nakorsaaneq Peter Vedsted oqarpoq arlallit tunillatsissimasut PCR atorlugu misissorneqarsimanngitsut, taamammat pisortat kisitsisaataannit amerlanerungaatsiartut tunillatsereernikuusimalertut.

Nakorsaanerup mianersortumik eqqoriarsinnaavaa innuttaasut 3.000-it sinneqartut coronavirusimik tunillatsereersimassasut. Ilulissani innuttaasut 4.751-iummata, tamanna isumaqarpoq ikinnerpaamik 63 procentii tunillatsereersimassasut.

Peter Vedstedip nalilerpaa illoqarfimmi eqimattatut tunillanneqarsinnaannginneq tikinneqarluinnalersoq.

- PCR atorlugu misissuinerni tunillatsissimasut amerlassusaannit naliliineq ingerlanneqarpoq. Misissortittuni tunillatsissimasut ullut tamaasa ikiliartorput. Tamanna isumaqarpoq tunillatsiffiusinnaasut aamma ikiliartortut, Peter Vedsted Sermitsiaq.AG-mut oqarpoq.

Ajornerpaaq qaangerparput

Ilulissani tuniluunneq qaammat ataatsip missaanili aallartippoq. Juullip ukiutoqqallu akornanni coronavirus illoqutigiinniit illoqutigiinnut tuniluutilerpoq. Peter Vedstedip saammarsaatigaa amerlanerpaartaat atuipilugatik napparsimasimammata.

Ilulissani utoqqaat illuat aamma tuniluuffiuvoq. Najugaqartut 16-it tunillatsissimasut januarip qiteqqunnerani paasineqarpoq. Najugaqartut tamarmik pingasoriarlutik kapitissimagaluartut, taamaattoq tuniluunneq ernumalersitsisimavoq.

- Innuttaasut utoqqaanerusut sanngiinnerusullu tassani najugaqartuupput. Soorunami ilaat perulupput. Maannali ajornerpaaq qaangersimalerparput, peruluttoqarujussuaqqinnissaalu naatsorsuutiginngilara, oqarpoq.

- Kisianni suli mianersussaagut. Eqimattatut tunillatsissinnaannginneq tikileraluaripput, taamaattoq tunillatsinnginnissamut suli mianersortariaqarpugut. Tunillatsiffissat ikinnerulerput, sulili tunillaasoqarsinnaavoq. Taamaammat ersiuteqaleraanni imminut mattusimanissaq suli pisariaqarpoq, Sermitsiaq.AG-mut oqarpoq.

Powered by Labrador CMS