Ilulissani arpatsitsisoqarmat meerarpassuit arpaqataapput
Oqaatsuniit Ilulissanut arpatsitsisoqarmat mittarfimmiit apuuffissamut 3 km-isut isorartutigisumut meeqqat arpaqataasut aatsaat taama amerlatigisut aaqqissuisoq oqaluttuarpoq. Nunakkut arpanneq silagilluinnartumi ingerlanneqarpoq.
Kapisilinniit Nuummut arpatsitsineq kisimi sapaatip akunnerata naanerani ingerlanneqanngilaq. Aammali nunakkut arpanneq - Oqaatsuniit Ilulissanut arpanneq - Ilulissani arfininngormat ingerlanneqarpoq.
Arpaqataasut 75-iusut silagilluinnartumi arpapput. Seqinnerpoq, anorsaalaaginnarluni qulinillu kialluni arpanneq arfininngornermi nalunaaqutaq 12.00 aallartimmat.
Oqaatsuniit Ilulissanut arpanneq 21-ssaat ukioq manna ingerlanneqarpoq. Arpaffissaq takinerpaaq 22,5 km-isut isorartutigaaq, nunaqarfimmiillu Oqaatsuniit Ilulissat illoqarfiata qeqqata tungaanut arpaffissaalluni.
Peqataasut pingajorarterutaat meeraapput
Aaqqissuusseqataasup arpatsitsineq iluatsilluartutut nalilerpaa. Kinguaariillu nikinneranni arpattartussanut aamma isumalluarnartoqarpoq. Ukioq manna arpatsitsinermi meeqqanut arpaffissaq 3 km-isut isorartutigisoq, meeqqanit arfineq-pingasut tungaannut ukiulinnit peqataaffigineqarsinnaasoq peqataasoqangaatsiarpoq.
- Immikkut maluginiagassaavoq meeqqat arfineq-pingasut tungaannut ukiullit amerlangaatsiartut peqataammata. 25-t peqataapput, tamanna ajunngilluinnarpoq, Bernhardt Olsen, arpatsitsinermi aaqqissuusseqataasoq oqaluttuarpoq.
Arpaqataasut sinneri 50-it inersimasuupput. Arpannermi takissutsit assigiinngitsut arpaffiusinnaapput. Takinerpaaq 22,5 km-iulluni.
Angutini 22,5 km-imut tallimat siulliit:
- Pilutaq Berthelsen 1.43.43 atorlugu
- Michael Clasen 1.47.03 atorlugu
- Vitalius Lennert 1.47.56 atorlugu
- Elias Rosbach 2.05.17 atorlugu
- Miki Fleischer 2.23.37 atorlugu
Arnani 22,5 km-imut tallimat siulliit:
- Carelia Larsen 2.20.53 atorlugu
- Katrine Lindegaard Hansen 2.21.11 atorlugu
- Victoria Hausgaard Yde 2.24.20 atorlugu
- Pipaluk Kristensen 2.36.20 atorlugu
- Ria Jensen 2.52.56 atorlugu
Rekordiliinerit qaangerneqanngillat
Angutini arnanilu takinermut arpattuni rekordiliinerit ukioq manna qaangerneqanngillat. Pilutaq Berthelsen angutini taamaalilluni suli rekordiliisuuvoq. Taassuma takinermut arpannermi 1 time, 37 min. 15 sekundillu atorlugit 22,5 km 2019-imi arpassimavaa.
Pipaluk Kristensenip arnat rekordiat 2017-imi qaangerpaa. Taassuma takinermut arpannermi 1 time, 59 minutsit 16 sekundillu atorsimavai.
Rekordiliisimasut ukioq manna arpannermi peqataaqqipput.