Ilulissani akunnittarferujussuaq nutaaq

Kommunimiilli suliniummut annertuumut akuersissut inaarutaasoq suli amigaataavoq. Qaasuitsup Kommunianiilli siusinaartumik ilimasaarut, missingersuutaagallartut, illunik titartaasartut titartagaat, aamma aningaaserivimmit ilimasaarut, atissaalu Hotel Ilulissat inissereerput.

Qatanngutigiit Bagger
Qatanngutigiit Tommy aamma Frank Bagger, taamatut annertuumik eqqarsaateqartuupput. Naak Qaasuitsup Kommunianit akuersissut suli amigaataagaluartoq, taakku qatanngutigiit marluk suliniutip annertuup piviusunngornissaa qularutiginngilaat.

- Akunnittarfimmik pilersaarutit piviusunngornissaannut, kommuni soqutiginnittorujussuaq nalunngilarput. Unnuiffissanik annertuumik amigaateqartoqartartoq ilisimavarput, ingammik ulapiffiusumi. Piffissaq ulapiffiusoq ukiut tamaasa sivitsoriartuinnarpoq. Maanna akunnittarfioreersuni aamma unnuiffiusartuni, aappaagumut ingerlalluartussanngoreersut ilisimavarput, Tommy Bagger oqarpoq.

- Illoqarfimmi unnuiffissanik amigaateqarneq pissutigalugu, Islandimit timmisartuussinissat pilersaarutaareersut aamma taamaatinneqartartut ilisimavarput.

- Pappilissat akuersissutit naammasseriarpata, piaartumik suliarinnittussarsiussaagut. Ataatsimut isigalugu tuaviuunneqassaaq, Tommy Bagger naggasiivoq.

Ilulissani sanaartornermut akit ilisimaneqartut malillugit, Hotel Ilulissat 50 millionit koruunit missaanni sanaartornermut aningaasartuuteqassaaq. Akunnittarfik tallimanik quleriiusussaq, illoqarfiup qeqqani Kâlêraq Poulsenip Aqqutaani inissisimassaaq.

Ilulissani inuussutissarsiortut ilisarisimaneqartut
Qatanngutigiit Tommy aamma Frank Baggerip ingerlatseqatigiiffik Tankeeraq ApS ataatsimut pigaat, taanna assartuinermik, ikummatissanik imerpalasunik nioqquteqarnermik, containerinik attartortitsinermik aamma radionik tv-nillu Ilulissani Nuummilu piginnittuupput. Aamma Ilulissat Marine Service suliffeqarfiutiginneqataaffigaat.

Hotel Ilulissat, Ilulissani akunnittarfiit angisuut tallimassarissvaat. Hotel Hvide Falk, Hotel Arctic, Hotel Icefiord aamma Hotel Avannaa illoqarfimmilu unnuisarfiit allat.