Ilulissani ajunaarnersuaqarnerani kalerrisaarut ajutoornikkut aallarsimasoq
Ilulissani innuttaasut ullaaralaaq illoqarfiup ajunaarnersuaqarnerani kalerrisaarutaanit itertinneqarsimapput. Politiilli ilisimatitsissutigaat, kalerrisaarut teknikkikkut ajortoqarneranit aallartinneqarsimasoq.
Pingasunngornermi ullaakkut nalunaaqutaq 04.55 Iluissani kalerrisaarutitut siggartaatit aallartissimapput. Tamatuma malitsigisaanik inuit arlallit politiinut siarngussimapput.
- Ingerlaannartumik inuit arlallit siarngutilersimapput, soorunami kalerrisaarut aallartinneqarmat inuit ernummateqalersimagamik, pigaartut pisortaat Malik Sandgreen Sermitsiaq.AG-mut oqaluttuarpoq.
Politiit ajutoornikkut tamanna pisimasoq Facebookikkut ilisimatitsissutigipallappaat. Kalerrisaarutillu aallarsimaneranut suna pissutaanersoq maannakkorpiaq misissorneqarpoq.
Ilungersunartumik pisoqassappat, politiit tusagassiorfiit aqqutigalugit kalerrisaaruteqartoqarniariartoq ilisimatitsissuteqassapput.
Imatut iliortoqartassaaq
Kalaallit Nunaanni Politiit ajunaarnersuaqarnerani kalerrisaarut aallartinneqarpat, innuttaasut qanoq iliortarnissaannik imatut ilisimatitsipput: - Illup iluaniiginnarnissaq, paasissutissallu ugguuna tusarsinnaavatit: KNR-ikkut, Sermitsiakkut kiisalu Kalaallit Nunaanni Politiit Facebookkikkut quppernaratigut.
- Pisariaqanngilaq politiinut qatserisartunullu sianissallutit. Soorunami sianersinnaavutit politiinit qatserisartunillu piaartumik ikiorneqartariaqaruit. Sianernikkut attaveqaatit matuneqarsinnaangamik, inuunermillu navianartorsiortut eqqorneqarsinnaallutik, Kalaallit Nunaanni Politiit ilisimatitsipput.