Iluliat RAL-ip umiarsuaataanut assersuisut

Royal Arctic Linep umiarsuaataata Upernaviup nunaqarfia Nuussuaq marloriarlugu tikinniartaralugu ilulianit akornusersorneqarpoq.

Ulloq 10. august RAL-ip umiarsuaataa nioqqutinik pajulluni Nuussuarmut tikittussaasimagaluarpoq. Umiarsualivimmilu iluliat pissutigalugit tikinneqanngitsoorpoq.

Ippassaq nioqqutissat apuunnissaat aamma iluatsinngitsoorpoq.

Ullormiit ullormut attaveqatigiinneq

Royal Arctic Line tusagassiuutinut nalunaarummi paasissutissiaraa, nunaqarfiup saavani ilulissat katersuussimasut pillugit ullormiit ullormut attaveqatigiinnerit ingerlanneqartartut.

Nioqqutit apuunneqarnissaat suli neriuutigineqarpoq.

Powered by Labrador CMS