Skip to main content

Iluliarsuarnit majsinut naatsiivimmut

Ilaqutariit Bonna aamma Peter Frederik Olsen Ilulissaneersut annertuumik alloriarput

Ilulissani illu isikkivigissoq attartortinneqarpoq. Atorfiit aalajangersimasut pitsaasut taamaatinneqarput. Pequttallu amerlanerpaartaat tunineqarput.

Tassami Bonnap aamma Peter Frederik Olsenip ernertik Milan, ukuassartik Nuunu aamma ernutartik arfineq-marlunnik qaammatilik Charlie Danmarkimut nooqatiginiarlugit aalajangerput, tassani Milanip assammik arsallammanngornissanik takorluukkani malersorniarpaa.

Taakku ernerat Marc 12-nik ukiulik Danmarkiliaqataavoq. Paniat Nivi Nuummi atuarpoq.

Apuuffik Hesselager
Ilaqutariit nittartakkakkut Fynip kangiani Hesselagerimi illumik nassaarput. Hesselageri Nyborgip aamma Svendborgæ akornanniippoq. Gudme Hallernimut kilometerit arlaqanngillat, Milan tassani sungiusartassaaq. Hesselaageri 900-nik inoqarpoq.

- Milanip assammik arsartarnera tapersersorniarlugu kissaatigisimavarput, Sermitsiaq.Ag Hesselagerimut pulaarmat, Bonna Olsen oqaluttuarpoq.

- Aggustip aallaqqaataani tikippugut. Nassatagut kisiisa nassarlugit tikippugut. Siullermik iliuusitta ilagaat, Odensemi Ikeamut pequttanik pisianiarneq. 

Inimi nuannersumi iikkami sorpassuaqarpoq, taakku oqaluttuaraat, ilaqutariit tassani najugaqartut assigiinngitsorpassuarnik pisinnaasaqartut. Ilaqutariit asseqarput, minnerunngitsumillu Bonna Olsenip nammineq qalipagai.

Aalajangerneq annertooq
Peter Frederiup isertuutinngilaa, Ilulissanit aallarluni ilisarisimasat qimallugit aalajangerneq annertusimasoq.

- Pisiniarfimmi pisortatut suliffiga maqaasivara, suliassarsiorpungalu. Angerlarsimaannartuunissanut tulluanngilanga. Qujanartumik maani timersoqatigiiffimmi arsartalereerpunga, taamaalillungalu ilisarisimasanik pilersitsiartulerpunga, suliffissannik nassaarnissara qularnanngilaq.

Igalaat saavini majsinut naatsiivissuarmiittut qujanartumik killorneqangajalerput, taamaalilluni Storebæltimut isikkivinissaaq, taanna kilometerit arlaqanngitsunik ungasissuseqarpoq. Soorunami  Qeqertarsuup Tunuani iluliarsuarnut isikkivik inngilaq, kisianni majseqarani pitsaaneruvoq.

Assammik arsartartoq Milan Olsen
Milan najukkamini Ilulissani N48-mi arsartarpoq. Angutaa aamma arnaa tassani unammisartuusimapput. 202 centimeterisut angissusiminik 100 kilongajammillu oqimaassuseqarnermini, Milan Olsen pitsaassutsimut naammaginartumik assammik arsartartoqatigiinniissinnaavoq.

Pisinnaasaasa aamma piukkunnassusaata pitsaanerpaanut ilanngukkumaarnera piffissap takutikkumaarpaa. Milan Olsen GOG-mi GOG 2-nut sungiusaqataasarpoq. Milan Olsen nunanut allanut unammisartunut ilaavoq, juunimilu Amerikap nunavittaani Argentianami pissartanngorniunnermut peqataavoq.

- GOG-mi sapaatip akunneranut sisamariarluta sungiusartarpugut. Ullut tamangajaasalu nukkassartarpunga, sapaatip akunnerilu tamaasa unammisassaagut, taava pitsanngorumaarpunga, Milan Olsen oqaluttuarpoq, nangillunilu:

- Kalaallit Nunaanni Danmarkimilu assammik arsaannerit assigiinngitsorujussuupput. Maani systemeqarnerulluta unammisarpugut. Sukkanerusumik unammisarpugut. Unammisartut timimikkut nukittunerujussuupput, dommerillu pisinnaatitsinerusarput.

- Maannamut nuannertupilussuusimavoq.

Milan Olsen Svendborgimi produktionsskolemi ilinniarpoq. Atuagarsornikkut ilinniassaaq, taamaalilluni politiinngornissaa aamma piviusunngorniassammat.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER