Iluliarsuaq nikeriarsimavoq
Innaarsunni Upernaviup avannaaniittumi innuttaasut tallimanngornermi ullaap tungaa suli sillimaqqissaarput
Iluliarujussuaq Innaarsuit avatinnguani ikkarlisimasoq unnuap ingerlanerani illuariaallalaarsimavoq. Iluliarsuarli suli nunaqarfimmut qaneqimmat innuttaasut sissamut qanittumiittut tiffasinnerusumut inissikkallarneqarsimasut, nunaqarfimmi aqutsisuni ilaasortaq Susanne K. Eliassen ilisimatitsivoq.
Iluliarsuarmik Innaarsuit avatinnguani ikkarlittoqarnera takornartarineqanngilaq.
- Kisianni iluliarsuaq maanna ikkarlisimasoq immaqa takusimasatsinni anginersaavoq. Iluliarsuaq minnerpaamik 100 meterinik portussuseqarpoq quppaqarlunilu putoqarluni. Taamaammat aserorsinnaanera aarlerinarpoq. Unnuap ingerlanerani ungavaallassimagaluarluni suli ikkarlisimarpasippoq, Susanne K. Eliassen oqarpoq.
Upalungaarsimanermi sillimaqqissaartut suleqatigalugit sisamanngornermi aalajangiunneqarpoq innuttaasut sissamut qanittumi najugallit atuarfimmut, illumut sullissivimmut meeqqerivimmullu inissikkallarneqassasut.
- Inissikkallarneqarsimasut oqaluttuarput unnuaq sinilluarsimallutik, Susanne K. Eliassen oqaluttuarpoq.
Taassuma ilanngullugu oqaluttuaraa umiatsiaatillit umiatsiatik allamut kisariartorsimagaat malissuaqalissappat tamanna aseruerujussuarsinnaammat. Innaarsunnili inuuniarnermut pingaaruteqarluinnartut arlallit sisamut qanittumiipput malissuaqalissappat innarlerneqarsinnaasut.
- Pisiniarfipput, innaallagissiorfik orsussanullu tankersuit sisap timinnguaniipput. Nukissiorfiit allatsik ippassaq matugallarpaat malissuaqalissappat sillimaniarlutik. Pisiniarfipput aamma matoqqagallarnissamik isumaliuteqarpoq, Susanne K. Eliassen oqarpoq.
Eqqaaneqareersutut iluliarsuarnik ikkarlittoqartarnera Innaarsummiut takornartarinngilaat.
- Pisariaqanngitsumik sissap qanitaaniittoqanngilaq aammalu meeqqat tamarmik oqaaqqissaarneqareerlutik tiffasissumi taamaallaat aneertassasut, Susanne K. Eliassen oqarpoq.
Sermitsiaq-AG-mi paasivarput Naalakkersuisut siulittaasuata Kim Kielsenip Innaarsunni pissutsit malinnaaffigeqqissaarai allallu assigalugit neriuutigalugu iluliarsuaq nammineq kaanngarumaartoq. Taamali pisoqarnissaa ajornakusoorsinnaavoq.
- Innaarsuit avatinnguani immap naqqa qooruusatut itinersaqarpoq iluliarsuup ikkarlilernermini aqqutigisimasaanik. Iluliarsuaq kaanngassaguni aqqut taanna atorlugu kaanngariartortussaassaaq taamalu tissukarluni nunaqarfipput qimallugu, Susanne K. Eliassen oqarpoq.