pilluarit
Iluliarmiu sullissiumatooq MIO-mit nersornaaserneqartoq
Ukiumoortumik MIO-p nersornaasiuttagaanik iluliarmiu Lena Ravn Davidsen meeqqanut inuusuttunullu sullissiluarnini pillugu nersornaaserneqarpoq
Ukiup aappassaa MIO NunaFonden peqatigalugu MIO-p nersornaasiuttagaa inummut sullissivimmulluunniit immikkut ittumik meeqqanik sullissisimasumut tunniunneqarpoq.
Iluliarmiu Lena Ravn Davidsen meeqqanut inuusuttunullu sullissiluarnini pillugu ukiormanna nersornaaserneqarpoq.
- Nersornaaserneqartoq Kalaallit Nunaannit tamarmit innersuussarpassuarnit toqqarneqarpoq. Ataatsimiititaliap Lena Ravn Davidsenimik nersornaasigassatut toqqaasup isiginiarsimavaa Lena Ravn Davidssen piumassuseqarluarluni sullissiumatulluinnartuusoq, sunngiffimmilu meeqqat inuusuttullu pitsaasunik sammisassaqartinniarlugit inuttut namminerlu aningaasaatini atorlugit suliaqartartuusoq. Meerarpassuit sungiusaasuuffigisarpai, taakkulu sammisassaqartinneqarnerminni ataatsimuussusermik nukittumik allanillu ataqateqarnermik misigisaqartarput. Lena Ravn Davidsen tunniutiinnajuitsuulluni meeqqat peqatigiiffinni kommunimilu peqqinnartunik sammisassaqartinnissaat qulakkeerniarlugu sulissutigiuartarpaa, uteriitsuullunilu illoqarfimmi sunngiffimmi sammisassanut nukinnik atugassanik pissarsiniartarluni.
Taama nunatsinni meeqqat pisinnaatitaaffii pillugit sullissivik tusagassiuutinut nalunaaruteqarpoq.
- Lena Ravn Davidsenip meeqqanik inuusuttunillu sullissinera peqatigiiffilerinermi timersornermilu piinnanngilaq, meerarpassuarnullu anaanaap aappaatut pissuseqartarpoq, taakkumi nalunngilaat Lena Ravn Davidsenip uummataani angerlarsimaffianilu tikilluaqqusaajuaannarlutik.
Nersornaat Lena Ravn Davidsenimut sisamanngornermi ualikkut Ilulissani nalliuttorsiualaarnermi Meeqqanut Siunnersuisoqatigiit sinniisaannit William Kriegelimit tunniunneqarpoq, taannalu ataatsimiititaliaq, NunaFonden aammalu MIO sinnerlugit Lena Ravn Davidsenip suliai annertuut pillugit nersorinnilluni oqalugiarpoq.
MIO-p nersornaasiuttagaa meeqqat pisinnaatitaaffiinik atugaannillu pitsaalluinnartumik nersortarialimmillu sullissinermut nersornaasiineruvoq. Nersornaat 20.000 koruuninik NunaFondenimit aningaasaliissutinik aningaasartaqarpoq.