Iluarsaassineq: Kommuneqarfik Sermersuup pilertortumik meeqqanik ikiuneq qulakkeerniarpaa

Suleqatigiit nutaat Kommuneqarfik Sermersuumi meeqqat pillugit nalunaarutit tamaasa isumagisarilissavaat

Kommuninut nakkutilliisoqarfik siorna Kommuneqarfik Sermersuumut sakkortuumik isornartorsiuivoq, kommunip meeqqat pillugit suliat iluamik suliarinngimmagit. Tamatumalu tukattumik ingerlanneqarnerani meeqqat kommunimit sumiginnarneqarput. Suliarpassuit maanna iluarsaavigineqarput, kommunillu sulianik nutaanik ingerlatsisinnaanngorneranik tamanna kinguneqarpoq, taakku pitsaanerusumik aamma sukkanerusumik meeqqat ikiorneqarnerinik qulakkeerinnissapput.

- Immikkut ittunik suleqatigiinnik aallartitsivugut, taakku meeqqanut suliat nutaat tamaasa paasisagut nalilersortassavaat. Meeqqanut Ilaqutariinnullu Aqutsisoqarfimmi pisortaq, Martha Lund Olsen, Sermitsiaq.AG-mut oqarpoq.

Pilertortumik qisuariarneq
Suleqatigiit taakku meeqqat misissuiffigeqqissaartassavaat, kingornalu periusissamik pilersaarusiorluti. Meeqqat qanoq ikiortariaanersut paasineqarpat, suliaq aatsaat ingerlateqqinneqartassaaq.

Meeqqat pillugit sullissinermi suleqatigiit allannguinermut annertuumut ilaapput, taakku poorskip kingorna atuutilissapput. Allannguinerup aamma ilagissavaa, sullissisut tallimat atorfinitsinneqarnissaat, taakku suliat pisoqaanerit uninngasut misissussavaat.

- Meeqqat pillugit suliat maanna uninngasut misissussavaat, Martha Lund Olsen oqarpoq.

Suliat 800-t naammassineqartut
Meeqqat pillugit suliat annertuumik iluarsaaffigineqarnerisa kingorna suliat nutaat aallartipput. Taamatut iluarsaassisoqarnerani Kommuneqarfik Sermersuup meeqqat pillugit suliat 800-t naammassisinnaasimavai. Ilaatigut suliat ingerlajunnaareertussaagaluit, aamma suliat ingerlaannaq iluarsiivigineqarsinnaasut suliarineqarput. Kommunip taamaalilluni suliat 1.200-t ilungersunartunik ajornartorsiorfiusut ukkatarisinnaanngorpai.

- Nammineq inunnik isumaginninnermut siunnersortitut suliat qaleriiaaginnalinnginnissaat pisariaqartoq ilisimavara, Martha Lund Olsen oqarpoq.

Sullissisimut ataatsimut suliat 35-t
Inunnik isumaginninnermut siunnersortit peqatigiiffiata NIISIP-ip, sullissisup ataatsip suliat 35-t suliarisarnissaanut kissaaataanut Kommuneqarfik Sermersooq iluarsaassinerup kinguneranik naammassinnissinnaanngorpoq. Suliat tamarmik ukiup ataatsip iluani nalilersoqqinneqarnissaat Martha Lund Olsenip neriorsuutigaa, kommunillu tamanna pisussaaffigaa.

Powered by Labrador CMS