Illuut
Illuut nutaanik qullersartaarpoq
Inissiaatileqatigiiffik Illuut nutaamik pisortartaarlunilu nutaanik siulersuisortaarpoq
Siulersuisunngortut tassaapput siulittaasoq Jukku Mølgaard, siulittaasup tullia Birthe Flæng Møller siulersuisunullu ilaasortaq Inge Bisgaard. Pisortamik toqqaasoqarnissaata tungaanut pisortaagallartutut atorfinitsinneqarpoq Søren Lennert Mortensen. Søren Lennert Mortensen Kalaallit Nunaanni inuussutissarsiornermi arlalissuarni pisortaasarsimasutut ilisimaneqarpoq, ilaatigut INI-mi, KNI-mi, KNR-mi, Tele-Postimilu, namminerlu Sisimiuni illunik tuniniaasarfimmini LM Ejendomme-mi.
Illuut Namminersorlutik Oqartussanit pigineqarpoq, taannalu Namminersorlutik Oqartussat inissiaataasa allaffiutaasalu ilaannik sanasarpoq, piginnittuulluni, attartortitsisartuulluni siunnersuisartuullunilu.
– Inissiaqarnermi nutaanik suliniuteqarnerit aaqqissuusseqqinnerillu pilersaarusiornissaannut ingerlannissaannullu siulersuisut peqataasinnaammata tamanna qilanaaraara. Ingerlatsivik mikisunnguuvugut inuiaqatigiinni pingaarutilimmik sulialik, siulersuisut siulittaasuat Jukku Mølgaard tusagassiorfinnut nalunaarut malillugu oqarpoq.
Illuut-ip illuutit 1100-t, 1,3 milliarder koruunit missaannik nalillit, pigai, ilaatigut Namminersorlutik Oqartussat allaffeqarfittaavat napasuliaq. Selskabi 2015-imi 16,8 millioner koruuninik isertitaqarsimavoq.