Illuut inissiat anorimit ajoquseqqinnginnissaannik qulakkeerinnippoq

Nuummi Qinngorpumi inissiap saqqaani iikkat assiaqutit qanoq ilillutik anorimit tinginneqarsimanersut, attartortitsisut misissuleruttorpaat.

Nuummi Igimami inissiap saqqaani assiaqutit annertuut arfininngormat anorimit tinginneqarmata misigisaq tupannartuuvoq.

- Misigisaq ersinarpoq. Ingasammik anori sakkortutseqqimmat, Frida Mathiassen, inissiami najugaqartoq, Sermitsiaq.AG-mut oqaluttuarpoq.

Inissiap iigaata silarliup katannerani najugaqartut ersitinneqarnerat, attartortitsisut Illuut paasilluarsinnaavaat.

- Misigisap ersinartuunera paasilluarsinnaavara, Illuut pisortaa Jette Larsen oqarpoq.

Sukkasuumik iliuuseqartoqartoq

Najugaqartut isumannaarniarlugit nakimaatsumik sukkasuumik qisuariartoqartoq tamatuma saniatigut oqaatigaa.

- Politiit aamma qatserisartut sukkasuumik tikiupput, najugaqartullu isumaginiarlugit tassaniipput. Iliuuseqarnerat nersualaarpara, Jette Larsen oqarpoq.

Tamatuma saniatigut Illuut ingerlatsisut Agerskov peqatigalugit erngertumik inissiamik isumannaallisaasoqarnissaanik isumaginnipput.

- Illuut siunnersortinik, inissianik nakkutilliisunik allanillu suleqateqarluni inissiap saqqaaniittunik katalersunik piiaavoq, pisortaq oqarpoq.

Tinginneqarneranit akunnerit marluk qaangiuttullu katattoqarnissaanik ulorianartorsiortoqarunnaartoq, politiit nalunaaruteqarput.

Pissutaasoq misissoraat

Maannalu ajoqusernera qanoq iluarsaanneqassanersoq misissorneqaleruttorpoq, tamatumalu qanoq pisinnaasimanera misissorneqassalluni.

- Inissiaq 2013-meerpoq, inissiaq taama nutaajutigisoq anorimit taamaattumit pitarneqarsinnaasussaanngilaq, Jette Larsen oqarpoq.

- Igimami inissiani allani taamatut sanaajusuni, tamatuma pisinnaannginnissaa qulakkiissavarput.

Inissiat saqqaani pladit eqqortumik ikkussorneqarsimanersut, kiisalu sananeqaataani sanngiitsoqarnersoq misissorneqassasoq, Jette Larsen nassuiaavoq.

Najugaqartut ilisimatinneqartut

Najugaqartut erngertumik ilisimatinneqarsimasut, taassuma aamma oqaatigaa.

- Ippassaq ualikkut mailimik nassiussivugut, kiisalu majuartarfeqarfimmi allagarsiilluta. Sanaatornikkut teknikkimik nalilersuinermi aallartitsilluta tassani nassuiarparput, ajoqusernerullu annertusinnginnissaa qulakkeerlugu, kiisalu piaarnerpaamik iluarsiiniarluta.

Attartortut inissiami najugaqarfimminni ajornartorsiortoqalissappat, ingerlatsisoq Agerskov oqarasuaat 343540-mut attaveqarfigineqarsinnaasoq aamma ilisimatitsivoq. GFS suleqatigalugu oqarasuaat ulloq unnuarlu attaveqarfigineqarsinnaavoq.

Powered by Labrador CMS