Illunik tuniniaasartut illunik tunisassarsiortorujussuupput

Nuummi inissiat piffissami matumani piumaneqartorujussuupput aamma illunik tuniniaasartut tunisaqarsinnaajumallutik pilerngutiinnavipput.

Nittartakkakkut aviisimi Sermitsiaq.ag-mi qanittukkut atuarneqarsinnaasutut, inissiat sanaartukkat nutaat Kissarneqqortuunnguamiittut tuniniarneqarnerat tupaallannartumik sukkasoorujussuarmik pivoq. Grønlands Ejendomskontorip tuniniaanermik isumaginnittuusup pilerngunneqarnerat tupaallaatiginngilluinnarpaa.

Inissiat piumaneqarluartut

Larseeraq Chemnitz Egede, inissianik pineqartunik tuniniaanermik isumaginnittuusoq nassuiaavoq,

inissianik tuniniaanissamut piareersarnerit ukiup ataatsip matuma siornagulli aallarnisarneqalereersut. Taamanimi suliniut pillugu aningaasaliisunut arlalinnut suleqatigisaminut tuniniaanermut aamma attartornermut tunngasunik paasissutissanik nassiussuivoq. Soqutiginninneq taamanili angeqaaq, siornalu ukiup naalernerani ukiullu matuma aallartilaarnerani tuniniaanini aallartikkamiuk inissiat 90 procentii sapaatip-akunnerisa pingasut-sisamat ingerlaneranni tunineqareerput.

Angissusii pilerigineqartut

Inissiat nutaat H.J. Rinksvejimiittut, maani Nuuk Ugeavisimi sapaatip-akunnerisa arlaqanngitsut matuma siornagut allaaserisatsinni pisut assigalugit, inissiat pilerigineqartunik angissuseqarput, tamatumalu kinguneranik pisiniartut ilarpassui akitigut malinnaasinnaallutik. Inissiat Kissarneqqortuunnguami portusuuni marlunniittut angivallaaratik 40 aamma 70 kvadratmeterinik angissuseqarput, aamma illoqarfimmi qiterpasissumi inissisimanertik pissutigalugu inuusuttunit siullermeerlutillu inissiamik pisisunit pilerigineqarluarlutik.

Larseeraq Chemnitz Egedep aamma erseqqissarpaa erniat aatsaat taama appasitsiginerat tuniniaanerup ingerlalluarneranut aamma patsisaaqataasoq.

Illoqarfimmut pitsaasuusoq

Grønlands Ejendomskontorip aamma Vagn Andersenip, H.J. Rinksvejimi sanaartortitsisuusut, nutaamik sanaartukkat illoqarfimmut pitsaasuummata isumaqatigiissutigaat. Ilaatigut taakku inissianik piserusuttunut inuusunnerusunut periarfissanik ammaassimmata, aammali ukiuni makkunani illoqarfimmut nuuttut amerlasuutut misinnarmata, taamaalillutillu inissianik tuniniaanermut tatiseqataallutik.

- Inissiat amerlanerulernerat Nuummut iluaqutaaginnarsinnaavoq, taamaalillutami inissiat pigineqartut eqqissilluta ullutsinnut naleqqussarsinnaaniassagatsigik. Taamaalillutami ilinniakkaminnik naammassinnittut angerlarusulersinniassagatsigik, Larseeraq Chemnitz Egede, Grønlands Ejendomskontorimeersoq oqarpoq.

Illoqarfiup immikkoortortassaa nutaaq tusarniaassutigineqartoq

Tamatuma peqatigisaanik Kommuneqarfik Sermersuup illoqarfiup immikkoortortassaatut nutaatut siunnersuut Mitsimmavik tusarniaassutigilerpaa. Illoqarfiup immikkoortortaani tassani illoqarfimmik Qinngutsinnit Siorarsiorfiup tungaanut annerulersitsisussami inissiat nutaat 160-it sanaartorneqassapput tamaanilu attaveqaatinik sanaartortoqassalluni. Siunnersuummut ilaatinneqarput ilaqutariit ataasiakkaat illussaat, illut uigulukuttut, inissiat portusuuliat aamma illut quleriiaat. Qitiutinneqartussaq tassaassaaq nungusaataanngitsumik ineriartortitsinissaq, taamaalilluni pinngortitaq avatangiiserineqartoq eqqarsaatigineqassammat, aamma sanaartornermi atorneqartunut piumasaqaatitaqassalluni. Tusarniaassutigineqarnera 2019-imi juulip pingajuannut killeqarpoq, tusarniaanermilu atugassat kommunip nittartagaanit aaneqarsinnaallutik.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS