Illuatungiliuttut: Royal Greenlandip tunineqarniarnera pipallataavoq

Inuit Ataqatigiit Siulittaasuata Múte B. Egedep naammgisimaarpaa, naalakkersuisooqatigiit Namminersorlutik Oqartussat allaffissorneranni aappaagumut aningaasanut inatsissami sipaarniuteqarfiusinnaasunik suliaqarsimanerat, tamannami IA-p isumaqatiginninniutigisimasaasa ilagimmassuk.

- Allaffissornermik aaqqissuusseqqinniarneruvoq, allanullu akissaqarnissaq anguniarlugu allaffissornermik pisariinnerulersitsillunilu akikinnerulersitsisussaq. Inuaqatigiinnut akornutaanngippat pitsaasuuvoq, taanna oqarpoq, kræftimillu nappaatillit nappaataannik sukkanerusumik paasisaqartarnissaq anguniarlugu suliniut nersualaarlugu.

IA-lli siulittaasuata nersualaarinninnera tassunga killeqarpoq. Nunap immikkoortuini mittarfiliornissat kiisalu Kangerlussuup Sisimiullu akornanni aqquserniornissaq aningaasassaqartinniarlugit, Royal Greenlandimik tunisaqarsinnaanermik misissuititsiniarneq nuannarinngilaa.

- Soorlu silami issittoq iloqqutsiinnarneq. Sivikitsunnguamik kissaallalaarluni. Paasisinnaanngilluinnarpara, naalakkersuisooqatigiit nunatta karsianut isaatitsinerpaaq tuniniarmassuk, Múte B. Egede oqarpoq.

RG kinguaariaat siunissami atugarissaartuunissaannik qulakkeerinnissasoq

- Royal Greenlandi suliffeqarfiutitta annersarivaat, atugarissaartuunerpullu aningaasaliiffiginiarlugu nunatta karsianut isaatitsisuulluni. Tamakkiisumik ilaannakuusumilluunniit namminersortunngorsarneqarneranut peqataanianngilagut, Kalaallit Nunaanni tamarmi aalisarnermik inuussutissarsiuteqarnissaq immikkoortunut politikkimut pingaaruteqarmat, taanna itisiliivoq.

Attasutip siulittaasuata Aqqalu Jerimiassenip isumaqatigiissut isumaqatiginngilluinnarpaa.

- Aningaasanut inatsisissaq kusanartunik imarisamigut naapertuutinngitsunik oqaasertaligaalluni pipallataavoq, siulittaasoq oqarpoq.

IA-p siulittaasuatulli Royal Greenlandimik tunisaqarniarneq isumaqatiginngilaa.

Partii Naleraq sinnerlugu Inatsisartuni ilaasotap Jens Napaattuup aamma aningaasaliissutigineqarniartoq nuannarinngilaa.

- Naalakkersuisooqatigiit innuttaasunut salloqittaaqqipput. Oqaatiginikuuaat akitsuusiisoqaqqissanngitsoq, maannali aalisakkeriviit imermik innaallagissamillu atuinerisa akiannik qaffaallutik akitsuusiipput. Aaamma Kalaallit Nunaata aningaasatigut isaatitsisorinerpaasuanik (Royal Greenland) tunisaqarniarneq akuersaarneqarsinnaanngilaq. Kinguaassataa isertitaqarfissatut periarfissaannik tuniniaanermut peqataasinnaanngilagut. Tamatuma malitsigisaanik atugarlunnerulissaagut, taanna oqarpoq.

Ingerlatseriaaseq qasunartoq

Atassummit isumaqatiginninniarnermik ingerlatsisimaneq suli tupigineqarpoq, tassani aalajangiussimallugu oqaatigaa, Atassut isumaqatiginninniarnermit tunngavissaqanngitsumik anisitaasimasoq. Vittus Qujaukitsup nalunaarutiginikuuaa, Atassutip pinngitsuugassaanngitsunik piumasaqaateqarnera, naalakkersuisooqatigiinnit akuerineqarsinnaanngitsut pissutigalugit partiip isumaqatiginninniaqatigileqqinnissaa tunngavissaqarsimanngitsoq.

Aqqalu Jerimiassenip oqaatigaa, isumaqatiginninniarnissamut tunngavissat kisimik pineqartut, kissaatigisanilu oqaatigeqqillugu.

- Pinngitsuugassaanngitsumik piumasaqaatigaavut, perorsaasut aningaasarsiaasa pitsaanerulersinneqarnisaat kiisalu umiarsuit takornariartaatit ilaasuisa amerlassusaat aallaavigalugit akileraarutinik akiliisinneqartalernissaat.

Isumaqatigiissummili ataatsimik nuannersortaqartoq, Atassummi siulittaasup oqaatigaa.

- Ataaserli nuannaarutigaarput. Naalakkersuisummi oqaasinnaarput ”Inuk Qitiutillugu” qulequtsiussimavaat, taanna oqarpoq.

Aningaasanik timmisartoqarfiliornernit suli aallerusuttoq

Jens Napaattooq isumaqarpoq, uttoqqaat siusinnerusukkut suliunnaarsinnaanerannik neriorsuuteqartarneq qineqqusaarutaannaasoq.

- Sulisimanermit nungullarsimagaanni siusinaartumik pensionisiaqalernissamut periarfissaqareerpoq, aaqqissuussarli ima ajornakusoortigivoq inunnit ikittuinnarnit atorneqartarluni, taanna oqarpoq.

Partii Naleqqamit aalajangiussimaneqarpoq, aningaasanut inatsit timmisartoqarfiliornernut aningaasaliissutinit aningaasaliiffigineqartariaqartoq.

- Tiimisartoqarfiliornerit suli isumassarsiatsialaanngillat, kukkusumik aningaasaliissuteqarneruvoq naatsorsuutigisamit akisunerulersinnaasoq, taanna naggasiilluni oqarpoq.

Suleqatigiissitsisunit oqaaseqartitsisoqarsinnaasimanngilaq.