Illuatungiliuttut: Peqataaqqissinnaanngilagut

Akisussaassuseqanngitsoq naaperiaasoqarnianngitsorlu.

Oqaatsit taakku, illuatungiliuttut aningaasanut inatsisissamut isumaqatiginninniarnermi peqataajunnaarnerminnik tallimanngornermi nalunaaruteqaramik, tunngavilersuutini uteqqittarput.

- Tunngaviit uagut eqqarsartaatsitsinnut naleqqutinngitsut annertuumik sajuppillatsitsisimapput. Pingaartumik ulluni kingullerni pisut aammalu aningaasanut inatsisissap suliarinerani, ilaatigut illuatungiliuttut suleqatigiumaneqaraluarlutik qarsupinneqartutut tusaaneqaratik, asuli anngaasussiaannartut inissinniarneqarnerat taanna akuersaanngilluinnaqqissaaratsigu, Hans Enoksen oqarpoq.

Illuatungiliuttut naapertorlugit sammisat arlalissuit Naalakkersuisut aningaasanut inatsisissaanni pingaartinneqanngillat:

• Peqqinnissaqarfik ilungersorpoq
• Illoqarfinni sumiiffinnilu minnerni sanaartornissat salliutinneqanngillat
• Utoqqalinersiat pillugit, utoqqaat sulisinnaasut kisimik salliutinneqassapput
• Akitsuutit
• Angerlarsimaffeqanngitsut naammattumik ikiorserneqanngillat
• Tarnimikkut ilungersuuteqartut puigorneqarput
• Inissiat ilinniartullu inissiai
• Meeqqat inuusuttullu puigorneqarput
• Kommunit akisussaaffeqarnerulerput, sulinissamulli immikkut aningaasalerneqaratik
• Aalisartut piniartullu puigorneqarput

Innuttaasut puigorneqarput

Inuit Ataqatigiit, Partii Naleraq, Atassut aamma Suleqatigiissitsisut erseqqissaapput innuttaasut, inuttaasunullu tungiuineq puigorneqartut, suliallu annertuut ukiuni tullerni sisamani salliutinneqartut. Ilanngullugu partiit oqariartuuteqarput ilisimanagu aappaagu aningaasanut inatsisissaq qanoq isikkoqassanersoq, naalakkersuisut naammattumik ilisimatitsisarsimanngimmata.

- Mittarfissuarnut 6 milliardinik aningaasaliinissamut Inatsisartullu inissiaannut aningaasaliinissamut akissaqaraanni,taava aamma meeqqanut aningaasaliinissamut akissaqartoqaraluarpoq. Ukiuni aningaasaqarnikkut ingerlalluarfiusuni meeqqat inuusuttullu aningaasaliiffigineqanngillat. Tamanna peqataaffigisinnaanngilarput. Taamaattumik, ajuusaarnaraluartumik, aningaasanut inatsisissamut isumaqatiginninniarnernit peqataajunnaarpugut, Suleqatigiissitsisut Inatsisartuni ilaasortaatitaat, Tillie Martinussen oqarpoq.

Akitsuutit

Partiit aningaasanut inatsisissamut 2020-moortumut atsioqataassanatik nalunaarnerannut tunngavilersuutit ilagilluinnarpaat akitsuutit. Partiit erseqqissaatigeqqippaat naalakkersuisut neriorsuisimasut amerlanerusunik akitsuusiissanatik, tamannali maanna piviusunngortinngikkaat. Suliat pingasut aallartereerput, sulilu allat suliarineqannguatsiarlutik.

Illuatungiliuttut pingasunik taasaqarput:

• Silaannakkut angalasunut akitsuutit
• Ikummatissanik akisunerulersitsineq
• Kiassarnermi akisunerulersitsineq

- Pitsannguutaanngilaq aningaasivernut koruuni iligukku, taavali 10 krone tigussaqqaarlugu, iluaqusiisuusaarneruvoq. Taamaattut pissusissamisoortutut isiginngilakka, Atassutip siulittaasua Aqqalu Jerimiassen oqarpoq.

- Oqarfigineqarneq peqataaniarpisi, imaluunniit naamik? Taama isumaqatiginninniartoqarneq ajortoq isumaqarpunga. Ornigukkaluarnerput oqarsinnaavunga kimeqanngimmat naggataani aalajangiinnarpugut, naamik tassa, tamaannga killeqartariaqarpoq. Annaassiniaasutut inissisimaneq tamaanga killeqartariaqarpoq, oqarpoq.

Illuatungiliuttut teknikkikkut suleqatigiissallutik aalajangerput, partiit tamarmik ataatsimiititaliat ilaanni issiasuutitaqarnissaat anguniarlugu. Politikkertik aallaavigalugu sulissallutik oqariartuuteqarput, suleqatigiissutigisinnaasaminnilli suleqatigiissallutik.

- Innuttaasut illersorlugit sulivugut. Aningaasanut inatsit innuttaasunut pitsaanerusumik atugaqalersitsinngitsoq peqataaffigisinnaanngilarput, taamaattumik peqataajunnaarluta nalunaarpugut, Múte B. Egede (IA) oqarpoq.

Partiit tamarmik Sermitsiaq.AG-mut ilisimatitsipput sunniuteqataanissamut sulinerminni suli siunnersuuteqartassallutik, siunnersuutillu pitsaasutut isigisatik akuerisassallugit.