Illuatungiliuttut: Nalunaarusiap Kielsen pinngitsuutinngilaa.

Eqqartuussissuserisoqarfiup Poul Schmidtip nalunaarusiaani nangaanartorpassuaqarnerata saniatigut, suliami paasissutissanik tigussaasunik amigaateqartoq, illuatungiliuttut partiivi isumaqarput. Taakku isumaat malillugu nalunaarusiaq illuinnaasiorluniluunniit tamakkiisuunngilaq.

Atassutip siulittaasuata Aqqalu Jerimiassenip aaqqissuussaassutsip ajutoorsimanera pakatsinarnerarpaa.

- Inuit ilaat immikkut pisinnaatitaaffeqarput. Pisoqartarsimaqaaq Kim Kielsenip aniguiffigisarsimasaanik, taamaammat tupaallattarunnaarsimavunga. Naatsorsuutigaa taamatut ittumik pisoqaqqissinnaasoq, tamannalu assut uggornarpoq, Atassummi siulittaasoq oqarpoq.

Taassuma neriuutigaa, tullissaanik qinersisoqalerpat qinersisartut akerlullutik taasiumaartut.

- Nunap qullersatut aqutsisuanit inatsit unioqqutillugu iliuuserineqartartorpassuit atuutsillugit, qinersisartut tullissaanik qinersisoqalerpat politikkerinik tutsuiginartunik unneqqarissunillu taasinermikkut tamanna kisimik allanngortissinnaavaat. Eqqortumik qanorluunniit iliuuseqarniarsaringaluarluni qanoq iliuusissaaleqinartarpoq, Aqqalu Jerimiassen oqarpoq.

Nangaassuteqarneq paassissutissallu amigaataasut

Suleqatigiissitsisut sinnerlugit Inatsisartuni ilaasortap Tillie Martinussenip nalunaarusiami paasiuminaatsitani erseqqissaatigai.

- Siullertut paasiuminaatsippara, angallat millionerpassuarnik nalilik ikinngutigisamut qanimulli ikinngutigilluagaanngitsumut attartortinneqarsimanera. Uanga taamaaliorsimangavianngikkaluarpunga, taanna oqarpoq.

Tamatuma saniatigut nalunaarusiap inerniliiffigineqarnerani nangaassuterpassuaqarnera tupigusuutigaa.

-Illuatungiusumut saqqummiussaannaappat sooq aningaasat taamak amerlatigisut atussavavut? Inatsisartut ataatsimiititaliaata aalajangiinissaa utaqqisariaqarparput. Inatsisartut Naalakkersuisunut sulisitsisuupput, taamaammat ataatsimiititaliap aalajangiussaa naggataatigut atortussaavarput, taanna oqarpoq.

- Demokraatit Nunattalu Qitornai isumaqarpata tamanna ajoquteqanngitsoq, taava issiavigisami issiarusunnerinnaavoq, Tillie Martinussen.

Inerniliussaq erseqqissoq

Inuit Ataqatigiit siulittaasuat Múte B. Egede aamma isumaqarpoq, suliaq kukkunersiuinermut ataatsimiititaliamit aalajangiiffigineqartussaasoq.

- Kammeradvokatip nalunaarusiaa illuatungiusumut saqqummiussaavoq, Kielsernip pinngitsuutinneqarnissaanut inniminnigaq. Kukkunersiuinermut ataatsimiititaliap oqartussaaqataaneq Inatsisartullu sinnerlugit qulakkeertussaavaa, naalakkersuinikkut ingerlatsinikkullu pitsaasumik ingerlatsisoqarnissaa, taanna oqarpoq nangillunilu itisiliilluni.

-Nalunaarusiami matumani inerniliunneqartoq tupaallannartortaqanngilaq. Paasisinnaavarali Kielsen pinngitsuutinneqavinngitsoq, aamma kammeradvokati paasissutissanik amigaateqarsimasoq. Isumaqarpunga Naalakkersuisut qanoq inerniliisoqarnissaanik anguniagaqarsimanerat erseqqissoq. Tassa inuiaqatigiit aningaasaataat illuatungiusumut saqqummiinissamut atorneqarsimapput, Múte B. Egede naggsiivoq.