Illuatungiliuttut: Mittarfiliortiternissami Kangerlussuup aningaasaqarneq navianartorsiortippaa
Kangerlussuaq mittarfittut ingerlaannaruni mittarfiliortiternissami tamakkiisumi aningaasaqarnikkut ajalusoortitsisinnaanera, IA-p aamma Partii Naleqqap ernumassutigaat.
Naak illersornissamut ministeriaqarfiup mittarfiup iluarsartuunneqarnissaa ingerlanneqarneralu akilerniaraluaraa, mittarfinnik suliniutinut tamarmiusunut aningaasaqarnikkut ajalusoortitsinnaavoq.
Aviisip Sermitsiap ilanngutassiaa naapertorlugu IA aamma Partii Naleraq taama isumaqarput.
– Kangerlussuaq pillugu aaqqiissutip maanna saqqummiunneqartup mittarfiliortiternissani tamarmiusuni inuiaqatigiit aningaasaqarneranni akilersinnaanissaanik pisussatut takorluukkani ataasinnguamilluunniit nassaassaqanngilaq. Ilumoortumik akilersinnaasutuaq tassaavoq Kangerlussuarmi mittarfiup qulimiguulinnut mittarfinngortinnissaa kiisalu mittarfiup iluarsaanneqarnissaanik sulisullu amerlanersaannik pisariaqartitsinermik atorunnaarsitsinissaq, Pele Broberg (PN), aviisimut Sermitsiamut oqarpoq.
Mittarfiliortiternissamut pilersaarut Inatsisartunit akuerineqarmat, inuiaqatigiit aningaasaqarnerannik misissuinernit assigiinngitsunik tunuliaqutaqarluni pivoq. Kangerlussuarmut tunngatillugu periarfissat marluinnaat atorlugit naatsorsuisoqarpoq: Kangerlussuaq heliportitut imaluunniit 1.500 meterisut takissuseqartussatut. Tassanilu heliporti akilersinnaaneruvoq.
Aammattaaq pilersaarutaasumut tunngatillugu saniatigut mittarfeqaleqqinnissaa, inuiaqatigiit aningaasaqarnerannut qanoq kinguneqassanersoq naatsorsuisoqarnikuunngilaq.
– Isumaqatigiissut akissutinut taarsiullugu apeqqutinik amerlanerujussuarnik pilersitsivoq. Naalakkersuisut illersornissamut ministerip taamatut isumaqatigiissuteqarfiginissaanut Inatsisartunit piginnaatitsissutit suunuku pissarsiarisimagaat. Isumaqatigiissut ilaatigut maanna Kalaallit Nunaannut isaaffiit 2023-mit pingasuusussanngornerannik, tassa mittarfissuit inuinnarnik timmisartuussinermut atorneqartussat pingasuusussanngornerannik, kinguneqartussanngorpoq. Kisianni tamanna mittarfiliortiternissamut atatillugu piginnaatitsissutinut inuiaqatigiillu aningaasaqarneranni tunngavissanut Inatsisartut 2018-mi ukiakkut aalajangiussaannut naapertuuppa, IA-p siulittaasua Múte Bourup Egede aperivoq.
Kisianni IA marloqiusamik tassani oqariartuuteqarpoq. Partiip siorna nammineq mittarfiliortiternissamut siunnersuummik saqqummiussaqarpoq, tassani Kangerlussuaq attatiinnarniarneqarpoq, kisianni qanoq iluseqarnissaa nassuiarneqarani.
Illersornissaqarfiup Kangerlussuup atornissaanik isumaqatigiissut pillugu aviisimi Sermitsiami paasisaqarnerusinnaavutit, uani ataani linki aqqutigalugu isissutissarsisinnaavutit: