Skip to main content

Illuatungiliuttut: Ilisimasimanngilarput atorfiit taama amerlatingisut atorunnaassasut

Avannaata Kommuniani Siumumi gruppemi siulittaasup Sakio Fleischerip tupaallaatigaa atorfiit taama amerlatingisut atorunnaarsinniarneqarmata. Ilaqutariinnut tamanna tussaaq, oqarpoq.

Kommunalbestyrelsemi suleqatigiittut isumaqatigiissutaat "Aqutsilluarneq - ineriartoqatigiinnerlu" 2021-meersoq kommunip aningaasaqarnerata ajornerani ipilluinnalerpoq.

Avannaata Kommuniani illuatungiliuttuni gruppip siulittaasua Sakio Fleischer (S) taama isumaqarpoq.

- Aningaasaqarnikkut aqutsilluartoqartoq takusinnaanngilarput, ineriartoqatigiinnermik aamma takusaqarsinnaanngilagut. Aningaasaqarneq aqunneqarsimanngilaq, maannalu iluatsinniarsaralugu sipaarniarnermik annanniartoqarpoq, Sakio Fleischer oqarpoq.

Nalimmassaanissami isumaqatigiittoqartoq

Kommunalbestyrelsep isumaqatigiittup ataasinngormat aalajangerpaat kommunimi atorfiit ikilisarlugit nalimmassarneqassasut. Siumumiilli tupaallaatigineqarpoq atorfiit katillugit 50-it atorunnaarsinneqassasut.

- Atorfiit taama amerlatingisut pineqarneri ilimagisimanngikkaluarpara. Aatsaat ullaaq atuarpara atorfiit amerlassusaannik nalimmassaanermi atorfiit 50-it atorunnaarsinneqassasut, Siumumi gruppimi siulittaasoq oqarpoq.

Kommunalbestyrelsep ataatsimiinnerannit imaqarniliami allassimavoq atorfinnik ikilisaanermi kommunimi qitiusumik allattoqarfimmi atorfiit arfineq-marluk peerneqartussanut ilaassasut. Imaqarniliami oqaluuserisamiluunniit allassimanngilaq atorfiit katillugit qassit pineqarnersut. Sakio Fleischerip aalajangiinissamut tunngatillugu tamanna apeqqutigineqarsimanngitsoq oqaatigaa.

- Paasitinneqarpugut atorfiit amerlassusaannik nalimmassaanissaq pisariaqartoq, akissarsianullu sipaartoqarsinnaalissasoq. Tamakku tunngavigalugit, aningaasaqarnerup patajaannerusumik pitsaanerusumillu angunissaa pillugu Siumut akuerseqataavoq, nassuiaavoq.

Missingersuutit sipporlugit atuinerunissaq ernumagaa

Avannaata Kommuniata Namminersorlutik Oqartussat kassekrediterisartik 20 milliuuniniit 35 milliuunit koruunit tungaannut qaffappaat. Ingerlatsiviit aamma missingersuutiminnit 2 procentimik sipaaruteqassasut aalajangerneqarsimavoq. Maannali paasinarsivoq sipaarniutit atorniaqqinnerillu naammanngitsut.

- Ernumagaarput aningaasanut missingiussat siornatut sipporlugit atorneqarnissaat. Qanoq iliuuseqanngivissorutta missingersuutit 30 milliuunit koruuninik sippoqqissinnaapput, oqarpoq nangillunilu:

- Siumumiit ernumagaarput kommuni Namminersorlutik Oqartussat ataanni aqunneqalersinnaanera. Aningaasaqarnerup aqunneqannginnera borgmesterip akisussaaffigaa, Sakio Fleischer oqarpoq.

Taassuma kommunit aqunneqarneranut inatsisartut inatsisaat innersuussutigaa. Tassani allassimavoq borgmesteri qitiusumik allattoqarfimmi aqutsinermut akisussaasuusoq. Sakio Fleischerillu ernumanartoqartippaa sulisut amerlanerusut soraarsinneqassappata, tamanna inunnik isumaginnittoqarfimmut aamma akisussasoq.

- Atorfiit atorunnaarsinneqarpata tamanna isumaqarsinnaavoq atorfeqarsimasut ilaat piffissap ilaani suliffissaqassanngikkallartut. Tamanna inunnik isumaginnittoqarfimmi pisortat pisartagaannik isumaginninnermi aningaasartuutaanerulissaaq. Aningaasartuutigunuku ikilisarniaraluarigut kommunip aningaasaqarnera pitsaanerulerniassammat, oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER