Illuatungiliuttut tassaarsuaqarsinnaanera pillugu: Mianersoqqutigineqartut ilungersunartuupput

Karrat Kangerluanni qaqqat sisooratarsinnaanerannik naliliisimaneq pimoorullugu tiguneqartariaqarpoq. Taamatut isumaqarput Siumumi siulittaasoq Erik Jensen aamma Demokraatit siulittaasuat Jens-Frederik Nielsen.

Partiit siulittaasui innuttaasunik ataatsimiisitsinissaq sioqqullugu Uummannap kangerluini qaqqat sisooratarsinnaanerisa ulorianarluinnarneri pillugit ilisimatinneqarsimapput.

- Paasissutissat nutaat pissarsiarisimasavut tunngavigalugit Siumumi politikkikkut anguniakkavut nalilersoqqittariaqarpavut. Illorsuit ammaqqinneqarnissannik anguaniakkavut suli ingerlatiinnassanerigut pillugu tunualiaqqutavut tusarniassavagut. Suli aalajangiussisoqanngilaq, paasissutissalli nutaat ilungersunaqimmata eqqarsaasersoqqittoqartariaqarpoq, Erik Jensen Sermitsiaq.AG-mut oqarpoq.

Naliliisimanerit nutaat takutippaat, Karrat Kangerluanni qaqqaq anginerpaaq sisuussagaluarpat, Illorsuarni illut tamarmik eqqorneqassasut. Tamanna qaqungu pissanersoq aamma taamaattoqassanersoq kialluunniit siumut oqaatigereersinnaanngilaa.

Innuttaasut kiffaanngissuseqartut

Demokraatit siulittaasuata Jens-Frederik Nielsenip aamma naliliisimanertit ilungersunartuunerarpai. Taassumali erseqqissaatigaa, innuttaasut sumi najugaqarusunnerlutik namminneq aalajangersinnaatitaasut.

- Innuttaasut sumi najugaqarusunnerlutik namminneq aalajangissavaat. Uagulli atugassarititaasunut sinaakkusiissaagut, innuttaasut tassaarsuaqarsinnaaneranik ulorianartorsiorfiusumi najugallit allamut nuukkusuttut periarfissaqartinniarlugit, Jens-Frederik Nielsen oqarpoq. Taamatut nalunaaruteqarneq Siumumeersup Erik Jensenip isumaqatigaa.

- Pinngitsaaliilluni nuutsitsisoqassanngilaq. Isumaqarpungali innuttaasut ulorianartorsiorfiusumi najugaqarnissamut ulorianarsinnaasut pillugit ilisimatinneqarnissaat pingaaruteqartoq. Taamaammat ilisimasallit oqartussallu nalilersuisimanerit pillugit ammasumik ilisimatitsissuteqarnerat tapersersorparput, Erik Jensen oqarpoq.

Allatut pilersaaruteqarnissaq eqqarsaatigineqartariaqartoq

Ajornerpaamik pisoqassappat Uummannami Uummannallu nunaqarfiini najugaqartut 500-t tassaarsuarmit taassumalu ajoqusiineranit eqqugaasussaapput. Niaqornat Qaarsuillu ajornerpaamik eqqugaasussatut isikkoqarpoq, aammali najugaqarfinni amerlasuuni Nukissiorfiit Pilersuisullu illuutaat kiisalu Uummannami napparsimmavik aalisakkerivillu malissuarnit eqqorneqarsinnaapput.

Taamaammat Jens-Frederik Nielsen isumaqarpoq, najugaqarnissamut atatillugu qanoq alloriaqqittoqarnissaanut pilersaarusiortoqartariaqartoq.

- Sumi najugaqartoqarnissaanut aalajangiisinnaassuseqarpugut. Aammali sumiiffinni ulorianartorsiorfiusorujussuani, ajornerpaamik pisoqassappat inuunermik naleqarsinnaasuni pisortat suliffeqarfiutaannik ingerlataqassanerluta eqqarsaatigisariaqarparput, taanna oqarpoq, innersuussutigalugulu suliassaq Naalakkersuisut ingerlattariaqaraat, Demokraatilli iliuusissanut partiip isumaqataaffigisaanut suleqataassasut oqaatigalugu.