Illuatungiliuttut Naalakkersuisunik tatiginnikkunnaarnermik taasititsinissamik piumasaqarput
Utoqqalinersiat pillugit Inatsisartuni oqallinnermi illuatungiliuttut Naalakkersuisunik tatiginninnginnermik taasititsinissamut piumasaqarput. Tatiginnikkunnaarnermut tunngavilersuutigineqarpoq utoqqalinersiat qaffanneqarpata utoqqalinersiaqartut qanoq annertutiginerusumik aningaasaateqartalernissaat.
Utoqqalinersiat pillugit aamma siusinaartumik soraarnerussutisiaqartarneq pillugu inatsisartut inatsisaata allanngortinneqarnissaanut pingajussaaneerinninneq, naammassilertortussatut taasissutigineqalertortussatullu naatsorsuutigineqarsinnaagaluartoq, Naalakkersuisunut tatiginninnermik taasititsisoqarnissaanik piumasaqarfigineqalerpoq.
Illuatungiliuttut tamarmiusut, Naleraq, Demokraatit aamma Atassut, tatiginninnginnermik taasititsinissamik piumasaqarput.
- Naalakkersuisut aningaasanut inatsimmut 2022 isumaqatiginninnermi akuersissutigineqarneranilu pisussaaffilernikuupput utoqqalinersiutillit 9.000 kruunit ukiumut tigusartagassat ilassallugit, 1. juli 2022-miit atuuttussaq.
Oqallinnermi illuatungiliuttut tunngavilersuipput utoqqalinersiutissat qaffannissaanni, ineqarnermut tapit kalluarneqannginnissaa pillugu Naalakkersuisunut saaffiginnittarsimagaluarlutik.
Naalakkersuisut allannguutissatut siunnersuutaanni utoqqalinersiallit qaammammut 750 koruunimik qaffaagineqassasut. Inissianilli attartortuusut ineqarnermut tapitigut sunnerneqartussanngorput, ilanngaatsinneqartarneq nikittussanngormat.
Tunniusseriarluni tiguseqqittarneq
- Assigiinnarpaa tunniusseriarluni, taava aamma tiguseqqilluni. Salluliuunneqartutut misigivugut. Minnerunngitsumik utoqqalinersiaqartut salluffigineqartutut misigissapput. Utoqqalinersiutillit atugaat pitsanngorsarniarneqartoq neriorsuutaasimavoq, iluaqutissaali malugineqarnavianngilaq, Jens Napaattooq, N, oqallinnermi oqarpoq.
- Naleraq, Demokraatit Atassullu aningaasanut inatsimmut isumaqatigiissuteqarsimasutut akuersaarsinnaanngilaat neriorsuummut qitiusimaqisumut pinngitsoortitsineq. Tamanna tunngavigalugu Naleraq, Demokraatit aamma Atassut Naalakkersuisut tatigiunnaarlugit taasinissarput qinnutigaarput, illuatungiliuttut allapput.
Utoqqalinersiuteqartut inimut tapisisarnerata qaffanneqaratarsinnaanerata pinngitsoortinniarlugu Naalakkersuisut misissuissallutik ilisimatitsereerput, tamannalu 2023-mut ingerlassangatinneqarpoq. Aaqqiisoqajaarnissaa illuatungiliuttut piumasaraat.
Tatiginnikkunnaarnermik taasititsinissaq pinngitsoortinneqarnissaanut Naalakkersuisut saqqummiussissasut naatsorsuutigineqarpoq.