Illuatungiliuttut ernumasut: Tunngaviusumik inatsisissap toqqammavia ajalusoorsinnaavoq
Innuttaasut oqallitsinneqarnerannik aallartitsinissaq nukinginnarpoq. Innuttaasut tunngaviusumik inatsisissap ilusilersorneqarneranut peqataatinneqanngippata »siunnersuutip inatsisitigut akuerisaanera qularnanngitsumik neriorneqalissaaq«,Vivian Motzfeldt isumaqarpoq.
Tunngaviusumik inatsisissaq pillugu Isumalioqatigiissitaq eqqissiviilliuutigineqaqqilerpoq. Isumalioqatigiissitap Kalaallit Nunaata siunissami tunngaviusumik inatsisissaanut missingiutip ilusilersorneqarnerani innuttaasunik akuutitsinissamut akisussaaffeqarunnaarsimanera Inatsisartuni illuatungiliuttunit isornartorsiorneqarlunilu eqqumiigineqarpoq.
Aviisi AG taama allappoq.
Isumalioqatigiissitap siulittaasortaava, Kuupik V.Kleist, AG-mi sapaatip-akunnerata siuliani apeqqarissaarfigineqarnermini paasissutissiivoq, isumalioqatigiissitap suliassai »inatsisissamut missngiutip suliarinissaanut, isumaliutissiissutip allannissaanut paragraffinulu ataasiakkaanut oqaaseqaatit allannissaannut annikillisinneqarsimasut«.
- Isumalioqatigiissitaamut suliakkiussaq nutartigaq suliakkiussaaqqaarsimasup innuttaasunik akuutitsinissamut tunngasortaanit allaanerungaatsiarpoq. Immikkoortoq taanna suliakkiussamit maanna peerneqarsimavoq, suliassaq tamanna Naalakkersuisut isumagisussanngorsimavaat, Kuupik V. Kleist AG-mut oqarpoq.
Tamanna Siumut naammaginngilaa.
- Naalakkersuisut tunngaviusumik inatsisissaq pillugu isumalioqatigiissitamut ilaanngillat. Isumalioqatigiissitaqarpoq Inatsisartunit toqqarneqarsimalluni sulisumik, suliassarlu tamanna Naalakkersuisut toqqaannartumik peqataaffigissanngilluinnarpaat. Minnerunngitsumik isumalioqatigiissitap nammineq tatiginassusia eqqarsaatigalugu, Siumumi siulittaasup tullia politikkikkullu oqaaseqartartoq, Vivian Motzfeldt, AG-mut oqarpoq.
Aviisimi AG-mi atuarnerusinnaavutit. Aviisi uani pissarsiariuk: