Illuatungeriit isumaqatigiissuteqarput suliumajunnaarnissaraluarlu taamaatiinnarneqarluni
Air Greenlandimit aamma Flyvebranchens Personale Unionuímit Air Greenlandimi saqisut pillugit isumaqatigiissut nutaaq pingasunngornermi atsiorneqarpoq, taamalu suliumajunnaarnissamik nalunaarutaasimasoq pinngitsoortussanngorluni. Isumaqatigiissuteqarnermi aamma 'angutit arnallu' assigiimmik uniformeqartarnissaat qulakkeerneqarpoq.
Suliumajunnaartoqartuuppat sapaatip-akunnerani matumani tallimanngornermiit silaannakkut angallassisarneq unitsinneqassangaluarpoq, maannali suliumajunnaartoqarsinnaanera pinngitsoortinneqarpoq. Air Greenlandimit aamma Flyvebranchens Personale Unionimit (FPU) pingasunngornermi ualikkut tusagassiorfitsigut nalunaauteqarluni taamatut ilisimatitsissuteqarput.
Nutaamik isumaqatigiissusiorniarluni isumaqatiginninniarnerit ajalusooreersut, Isumaqatigiissitsiniartarfimmi illuatungeriit marluullutik isumaqatigiissuteqarput.
Nalunaarut naapertorljugu illuatungeriit isumaqatigiissutip nutaap qanoq imaqarnera oqaaseqarfigerusunngilaat, oqaatigaalli Isumaqatigiissitsiniartarfimmi ukiunut sisamanut isumaqatigiissuteqarsimaneq nuannaarutigineqartoq.
Isumaqatigiissuteqartoqarmat pilersaarutit malillugit juullikkunni angallassisoqarsinnaalerpoq.
Isumaqatigiissut naammagisimaarneqartoq
- Suliffitta piffissami sivisuumi pilerinarsarneqarnissaanik unammillersinnaanissaanillu ukkatarinnissinnaanngornerput nuannaarutigaara, Air Greenlandimi pisortaq Mads B. Christensen oqarpoq.
Saqisut kattuffiannit aamma isumaqatigiissut naammagisimaarneqarpoq:
- Ilaasortatta sulinerannik qulakkeerinnittumik pitsaasumillu suliaqartarnerannik akuersaartumik angusaqarluarsinnaalluta immitsinnut naapeqatigiissinnaasimanerput nuannaarutigaara, FPU-mi siulittaasup tullia Anders Mark Jensen oqarpoq.
Ukioq manna aappassaanik ingerlatseqatigiiffimmi sulisut suliumajunnaarnissamik nalunaaruteqartoqarmat aappassaanik Air Greenlandi Isumaqatigiissitsiniartarfimmi sulisut kattuffiannut isumaqatigiissusiorpoq. Upernaaq påskinngilaataani Dansk Metal timmisartunut mekanierit atugaannik pitsaanerulersitserusulluni suliumajunnaartoqarnissaanik aarlerisaarivoq.
Assigiimmik uniformeqartarnissaq 2023-mi atuutsinneqalissasoq
Illuatungeriinnit ilisimatitsissutigineqarpoq, immikkut ittumik isumaqatigiissutigineqarsimasoq, saqisut angutaappata arnaappataluunniit 2023-p ingerlanerani assigiimmik uniformeqartalissasut.
Isumaqatigiissitsiniartarfimmi nalunaaquttap-akunnerini 29-ni isumaqatigiissitsiniartoqarersoq nutaamik isumaqatigiissuteqartoqarpoq, isumaqatigiissullu saqisut katersuutsinneqarnerisigut maanna akuersissutigineqartussanngorluni.
Air Greenlandimi pisortaanerup Jacok Nitter Sørensenip suliumajunnaartoqarsinnaanrata pinngitsoortinneqarnera naammagisimaarlugulu oqiliallaatiginerarpaa.
- Pilersaarutit malillugit angallasseqqissinnaalernerput oqiliallaatigaara. Pisisartugut suleqatigullu aamma ingerlatseqatigiiffik sinnerlugit juullikkunni pilersaarutit malillugit angallassisinnaanngornerput oqiliallaatigeqaara, pisisartuttalu paasinninnerannut qujarusuppunga, Jacob Nitter Sørensen oqarpoq.