Illu nunguilluni ikuallassimasoq: Najugaqartoq ajoqusersimasut nakorsiartarfiannukaanneqarsimavoq
Tasiilami illu marlunngornermi unnukkut ikuallalersimavoq. Illup inua putsumik iioraasimasoq ajoqusersimasut nakorsiartarfiannukaanneqarsimasoq, politiit ilisimatitsipput.
Politiit Tasiilami illu aqqusinermi Napparngummumiittoq ikuallattoq pillugu marlunngornermi unnukkut nal. 23.16 nalunaarfigineqarsimapput.
Pigaartut pisortaata Jens Rønbergip Sermitsiaq.AG-mut ilisimatitsissutigaa, politiit qatserisartullu unnuaq ikuallattumukartinneqarsimasut.
Illup inua, angut 30-kkut qiteqqunneranik ukiulik putsumik iioraasimasoq ajoqusersimasut nakorsiartarfiannukaanneqarsimavoq. Politiit paasissutissaataat naapertorlugit, taanna kisimi illumi najugaqartuuvoq.
Illu nungulluni ikuallassimavoq, politiillu illumik misissuinissamut pingasunngornemi illup nillornissaa utaqqimaarpaat.
Ikuallannermut suna pissutaanersoq suli ilisimaneqanngilaq, pigaartulli pisortaata oqaluttuaraa, sumiiffik misissuiffigineqaleruttortoq aamma takunnissimasinnaasunik oqaloqateqartoqartoq.