Illorsuarmiunut tusakkat ajuusaarnartut
Nunap sisooqqinnissaa ilimanartorujussuusoq Naalakkersuisut siulittaasuata Kim Kielsenip ilisimatitsissutigaa.
Nuugaatsiaq Illorsuillu kiisalu kangerluup ilaa tassunga atasoq ulorianaateqartutut suli isigineqartariaqartut Kim Kielsen Nivi Olsenip apeqquteqaataanut akissuteqarpoq.
Tamatuma malitsigisaanik Kalaallit Nunaanni upalungaarsimanermut ataatsimiititaliaq naliliivoq tunngavigisat pigineqartut tunngavigalugit innuttaasut Nuugaatsiamut Illorsuarnullu suli utertariaqanngitsut, taakkulu ulorianartut eqqaanni angalaartariaqanngitsut ilisimatitsissutigaa.
Sisooqqissinnaasut
- Maannakkut inissisimaneq tassaavoq qaqqani nunap sisoorataqqissinnaanerata ”aarlerinartorujussuunera”. Aarlerinartuusumi ilisimaneqartumi qaqqat innartai sisooratarsinnaasut arlallit paasineqarsimapput. Ilaatigut qaammataasanit assit nunallu sajuppillatsinneranit paasissutissat iluaqutigalugit nunat sisooratarsinnaasut nakkutigineqarput, Kim Kielsen apeqquteqaatinut akissuteqarpoq.
Qaqqami sisooratarsinnaasut ingerlaavartumik nakkutigineqarput, aamma qaqqami sisooratarsinnaasuni pissutsit allanngorpata upalungaarsimanikkut nutaamik nalilersuisoqassasoq Naalakkersuisunut siulittaasoq oqarpoq.
Sisamat ajunaarput
Ulloq 17. juni 2017-imi pinngortitami ajunaarnersuarmi inuit sisamat ajunaarput, nunaqarfinnilu najugaqartut qimagussuunneqarlutik.