Illoqarfiup orpiisa ikinneqarnerini juulimaaq ilungersuasoq
Sisimiuni Qaqortumilu illoqarfiup orpiliaata ikinneqarnissaa unammillernartoqalaarsimavoq. Qaqortumi juulimaap biilii pujuliulermata uninngagallartariaqarsimavoq, Sisimiunilu orpiliaq pilersaarutit malillugit ikinneqanngitsuuilluni.
Adventit sapaataat siulleq tassaavoq juulimaap aamma ulapiffia.
Suna tamarmi ingerlalluartariaqarpoq, piffissarlu eqqorlugu pilersaarutit naammassineqartariaqarput. Ullormi taanna nunatsinni illoqarfiit orpiliaat nal. 16.00 ikinneqartarpoq. Sumiiffiilli ilaanni orpiliap ikinneqarnissaa sapaammi 27. november ajornaatsuinnaasimanngilaq.
Qaqortumi juulimaap biilii pujuliulermata juulimaaq illoqarfimmi biilinik kaajallaatilluni uninngagallaqqaartariaqarsimavoq.
Qaqortumi innuttaasoq oqaluttuarpoq juulimaap biilii akunnerup affaata ingerlanerani iluarsineqarsimasut, illoqarfiullu orpiliaa piffissaq eqqorlugu ikinneqarsimasoq.
Ikinngitsuuittoq
Sisimiuni orpiliap ikinnissaa ajornakusoorneruvoq.
Juulimaaq piffissaq eqqorlugu apuukkaluarpoq. Innuttaasut meeqqallu qilanaartut hunnorujulikkaat pissangallutik utaqqisut ilassillugit. Orpilialli ikinnissaa iluatsinngitsoorpoq, qulleeqqallu suli qaminngasut innuttaasut ingerlaqqiinnartariaqarsimapput.
Illoqarfiup orpiliaani qulleeqqat ikinngitsoorneranni nissiaqqat qinngasaarisimasutut ilimatsaanneqarnerat juulimaap sapaammi unnulersukkut akerlilerpaa. Facebookimini ilisimatitsivoq innaallagialerisut suliassamik naammassinninngitsoorsimanerisa kingunerisaannik orpiliap qulleerai ikinngitsoorsimasut.
- Sisimiuni illoqarfiup orpiliaata ikinneqanngitsoornerani nissiaraatigut qinngasaarisuunngillat. Tamannali pivoq innaallagialerisut suliaminnik naammassinninngitsoornerisa kingorna. Nissiaraatigut pisuutikkunnaarniarsigit. Oqaatigisinnaavara suliffeqarfik innaallagialerisoq "naalanngitsut" allattorsimaffiannut ilanngunneqarmat, juulimaaq Facebookimini allappoq.