Illoqarfiup bussii nutaat bilitsinut akitsortitsissasut
Nuup Bussii bussinut nutaanut annertuumik aningaasaliisussanngoqqavoq, tamannalu bilitsit akiinut arlaatigut sunniuteqassaaq.
Illoqarfiit pingaarnersaata illoqarfiup bussiinik ingerlatseqatigiiffia ukioq manna bussinut nutaanik pingasunut aamma 2022-ip tungaanut ingerlatseqatigiiffik bussinut tallimanut aningaasaliissaaq.
Tamatuma nassuiaatissartaraa, maanna illoqarfiup bussiisa pisoqaassusaat agguaqatigiisillugu ukiunik 24-nit 25-nut pisoqaassuseqarmata. Akuersissut pillugu isumaqatigiissummi kommunip piumasaraa, bussit annerpaamik ukiunik 18-inik pisoqaassuseqarsinnaassut, tamatumalu kinguneranik bussinik ingerlatseqatigiiffik ukiormannaannaq bussinut nutaanut 6 millionit koruuninik aningaasaliissalluni.
- Bussinut nutaanut aningaasaliinitsinni bilitsimut akinut sunniuteqassaaq, bussinik ingerlatseqatigiiffimmi pisortaq Mogens Nathansen Sermitsiaq.AG-mut ilisimatitsivoq. 2018-imi ilaasut 2 millioninit amerlanerusut ilaasorineqarput.
Periarfissat marluusut
Bussit nutaat qanoq aningaasaliiffigineqarnissaat maanna siulersuisuni isumaliutersuutigineqaleruttortoq, taanna nassuiaavoq. Bilitsip atuuttarnera ingerlatseqatigiiffiup sivikillisinnaavaa, taanna ullumikkut akunnerup aappaa avillugu atuuttarpoq. Imaluunniit bilitsit assigiinngitsut akitsorneqarsinnaapput.
Periarfissaq sorleq ingerlatseqatigiiffiup atussaneraa suli aalajangerneqanngilaq. Akinik allannguisoqarniartillugu ingerlatseqatigiiffik kommunalbestyrelsimit akuersissummik peqqaartartussaanikuuvoq, kisianni ingerlatseqatigiiffik ullumikkut unammilleqatigiinneq tunngavigalugu ingerlanneqarnissaa aalajangerneqarsimavoq.
Naatsorsuutit naammassineqartut
Nuup Bussiisa 2018-imut naatsorsuutitik naammasseqqammerpaat, tassani 264.000 koruuninik sinneqartooruteqartoqarpoq, ukiup siulianilu 56.000 koruuninik sinneqartooruteqartoqarluni. Nammineq aningaasaatit 19,6 millionit koruuniupput, 2017-imullu sanilliullugu siorna kaaviiaartitat 26.483.000 koruuninit 26.274.000 koruuninut ikilerialaarsimapput.
Bussinik ingerlatsinermi 71 procentit kaaviiaartinneqarput, ingerlatsinermut tapiissutit 18 procentit, atuartunik ingerlassinermit 13 procentit aamma attartortitsinermit 5 procentit, procenti ataaseq ”isertitat allat” ataaniilluni.
2018-imi bilitsit akiisa agguaqatigiisinneqarnerat bilitsimut ataatsimut 11,52 koruuniupput, tamannalu ukiup siulianut sanilliullugu 0,04 koruunimik qaffariaateqarpoq, tassanilu qaammamut kortip ullut 30—it ingerlaneranni 48-riarluni atorneqartarneranut naatsorneqarsimalluni.
Attartortunik ingerlatsinerit ikileriarujussuartut
Ingerlatseqatigiiffik attartorluni bussinik ingerlatsinermi annertuumik appariarfiusimavoq – kaaviaartitanit 17,7 procentinik appariarnerulluni, ilisisuni ingerlatsineq 1,9 procentimik ukiup siulianut sanilliullugu qaffariarsimalluni.
Aqagu sisamanngornermi ingerlatseqatigiiffimmi ataatsimeersuartoqassaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...